قر ءبىلىم جانە عىلىم ءمينيسترى اسحات ايماعامبەتوۆ اقتوبە وبلىسىنا ارنايى ىسساپارمەن كەلدى. مينيستر وبلىستاعى جوعارى جانە ارناۋلى وقۋ ورىندارىندا بولىپ، پەداگوگتارمەن كەزدەستى دەپ حابارلايدى "ادىرنا" ۇلتتىق پورتالى.
وبلىس اكىمى وڭداسىن ورازالين مەن مينيستر اسحات ايماعامبەتوۆ ەڭ الدىمەن جۇمىس ساپارىن ق.جۇبانوۆ اتىنداعى اقتوبە وڭىرلىك ۋنيۆەرسيتەتىنىڭ پروفەسسور-وقىتۋشىلار قاۋىمىمەن كەزدەسۋدەن باستادى.
مينيستر ءبىلىم ورداسىنىڭ ۇجىمىنا «بولاشاق» باعدارلاماسىنىڭ تۇلەگى، گۋمانيتارلىق عىلىمدار ماگيسترى، نازارباەۆ ۋنيۆەرسيتەتىنىڭ دوكتورانتى لاۋرا قاراباسوۆانى رەكتور ەتىپ تاعايىنداپ، ۇجىممەن تانىستىردى.
اتاپ وتەيىك، مينيستر اقتوبەنىڭ تۋماسى، وسى ۋنيۆەرسيتەتتىڭ تۇلەگى بوپ سانالاتىن جاڭا رەكتور ل.قاراباسوۆانىڭ قىزمەتىنە ساتتىلىك تىلەپ، وڭىرلىك ۋنيۆەرسيتەتتى العا جىلجىتۋ باعىتىندا زور سەنىم ارتىلىپ وتىرعانىن ايتىپ ءوتتى.
بۇدان كەيىن مينيستر اقتوبە جوعارى پوليتەحنيكالىق كوللەدجىندە بولىپ، «جاس مامان» جوباسىنىڭ جۇمىسىمەن تانىستى. كوللەدجدە كوپتەگەن جاستار اۋىلشارۋاشىلىعى، مۇناي جانە گاز، ەلەكترمەن جابدىقتاۋ باعىتىندا ءبىلىم الۋدا. كوللەدج ستۋدەنتتەرىنىڭ شىعارماشىلىق جۇمىستارىمەن تانىسىپ، ءىس-تاجىريبەسىنە كوز جىبەرگەن مينيستر مەملەكەت تاراپىنان ءبىلىم سالاسىنا جاسالىپ جاتقان قولداۋ تۇرعىسىنداعى جۇمىستارعا توقتالىپ ءوتتى.
ءمينيستردىڭ جۇمىس ساپارى باتىس شاعىن اۋدانىندا ورنالاسقان «ءبىلىم» مەكتەپ-گيمنازياسىندا جالعاستى. جەكە كاسىپكەردىڭ قارجىسىنا تۇرعىزىلعان جاڭا نىساننىڭ ءىشىن ارالاپ كورگەن باس ۇستاز زاماناۋي تالاپتارعا ساي جابدىقتالعان كلاستارعا ءوزىنىڭ وڭ باعاسىن بەرىپ ءوتتى.
جۇمىس ساپارىنىڭ سوڭىندا مينيستر ا.ايماعامبەتوۆ ءوڭىر باسشىسى و.ورازالينمەن بىرگە وبلىس اكىمدىگىندە ايماقتىڭ ءبىلىم سالاسىنىڭ قىزمەتكەرلەرى، پەداگوگيكالىق قاۋىمداستىعىمەن، مەكتەپ ديرەكتورلارىمەن ۇيىمداستىرىلعان كەزدەسۋگە قاتىسىپ، مەملەكەت باسشىسىنىڭ جولداۋىندا ايتىلعان باسىمدىقتارعا توقتالدى.
- مەملەكەت باسشىسى ءبىلىم-عىلىم ساپاسىن ارتتىرۋ باعىتىندا الدىمىزعا ناقتى تاپسىرمالاردى قويىپ وتىر. پەداگوگ مارتەبەسىن كوتەرۋ، مەكتەپ قۇرىلىسىن ارتتىرۋ، جوعارى جانە ارناۋلى ءبىلىم مەكەمەلەرىن قولداۋ بويىنشا ەلىمىزدە كوپتەگەن جۇمىستار اتقارىلىپ جاتىر. الداعى ۋاقىتتا پرەزيدەنت تاپسىرماسىن ورىنداۋ بويىنشا ەلىمىزدە مىڭنان استام مەكتەپ سالىنادى. اقتوبە وبلىسىندا دا 20 مەكتەپتىڭ قۇرىلىسى جۇرگىزىلۋدە. ءبىز وبلىس اكىمىمەن بىرگە ءبىلىم سالاسىن قولداۋ باعىتىندا ەكىجاقتى مەموراندۋمعا قول قويدىق. ساپالى ءبىلىم بەرۋ مەن ۇستازدار قاۋىمىن قولداۋ تۇرعىسىنان كەلگەندە اقتوبە وبلىسىنىڭ الەۋەتى وتە جوعارى. وڭىردە جاسالعان جۇمىستار وتە كوپ، بىرلەسىپ اتقاراتىن جۇمىستار ءوز جالعاسىن تاباتىن بولادى، - دەدى ا.ايماعامبەتوۆ.
جۇمىس ساپارىنىڭ سوڭىندا اسحات ايماعامبەتوۆ ءبىلىم سالاسىنداعى وڭ وزگەرىستەرگە كوڭىل ءبولىپ، ۇستازدار قاۋىمىنا كوپ قولداۋ كورسەتىپ كەلە جاتقان وبلىس اكىمىنە العىسىن ءبىلدىردى.
"ادىرنا" ۇلتتىق پورتالى.
