QR Bilim jáne ǵylym mınıstri Ashat Aımaǵambetov Aqtóbe oblysyna arnaıy issaparmen keldi. Mınıstr oblystaǵy joǵary jáne arnaýly oqý oryndarynda bolyp, pedagogtarmen kezdesti dep habarlaıdy "Adyrna" ulttyq portaly.
Oblys ákimi Ońdasyn Orazalın men mınıstr Ashat Aımaǵambetov eń aldymen jumys saparyn Q.Jubanov atyndaǵy Aqtóbe óńirlik ýnıversıtetiniń professor-oqytýshylar qaýymymen kezdesýden bastady.
Mınıstr bilim ordasynyń ujymyna «Bolashaq» baǵdarlamasynyń túlegi, gýmanıtarlyq ǵylymdar magıstri, Nazarbaev ýnıversıtetiniń doktoranty Laýra Qarabasovany rektor etip taǵaıyndap, ujymmen tanystyrdy.
Atap óteıik, mınıstr Aqtóbeniń týmasy, osy ýnıversıtettiń túlegi bop sanalatyn jańa rektor L.Qarabasovanyń qyzmetine sáttilik tilep, óńirlik ýnıversıtetti alǵa jyljytý baǵytynda zor senim artylyp otyrǵanyn aıtyp ótti.
Budan keıin mınıstr Aqtóbe joǵary polıtehnıkalyq kolledjinde bolyp, «Jas maman» jobasynyń jumysymen tanysty. Kolledjde kóptegen jastar aýylsharýashylyǵy, munaı jáne gaz, elektrmen jabdyqtaý baǵytynda bilim alýda. Kolledj stýdentteriniń shyǵarmashylyq jumystarymen tanysyp, is-tájirıbesine kóz jibergen mınıstr memleket tarapynan bilim salasyna jasalyp jatqan qoldaý turǵysyndaǵy jumystarǵa toqtalyp ótti.
Mınıstrdiń jumys sapary Batys shaǵyn aýdanynda ornalasqan «Bilim» mektep-gımnazııasynda jalǵasty. Jeke kásipkerdiń qarjysyna turǵyzylǵan jańa nysannyń ishin aralap kórgen bas ustaz zamanaýı talaptarǵa saı jabdyqtalǵan klastarǵa óziniń oń baǵasyn berip ótti.
Jumys saparynyń sońynda mınıstr A.Aımaǵambetov óńir basshysy O.Orazalınmen birge oblys ákimdiginde aımaqtyń bilim salasynyń qyzmetkerleri, pedagogıkalyq qaýymdastyǵymen, mektep dırektorlarymen uıymdastyrylǵan kezdesýge qatysyp, Memleket basshysynyń Joldaýynda aıtylǵan basymdyqtarǵa toqtaldy.
- Memleket basshysy bilim-ǵylym sapasyn arttyrý baǵytynda aldymyzǵa naqty tapsyrmalardy qoıyp otyr. Pedagog mártebesin kóterý, mektep qurylysyn arttyrý, joǵary jáne arnaýly bilim mekemelerin qoldaý boıynsha elimizde kóptegen jumystar atqarylyp jatyr. Aldaǵy ýaqytta Prezıdent tapsyrmasyn oryndaý boıynsha elimizde myńnan astam mektep salynady. Aqtóbe oblysynda da 20 mekteptiń qurylysy júrgizilýde. Biz oblys ákimimen birge bilim salasyn qoldaý baǵytynda ekijaqty memorandýmǵa qol qoıdyq. Sapaly bilim berý men ustazdar qaýymyn qoldaý turǵysynan kelgende Aqtóbe oblysynyń áleýeti óte joǵary. Óńirde jasalǵan jumystar óte kóp, birlesip atqaratyn jumystar óz jalǵasyn tabatyn bolady, - dedi A.Aımaǵambetov.
Jumys saparynyń sońynda Ashat Aımaǵambetov bilim salasyndaǵy oń ózgeristerge kóńil bólip, ustazdar qaýymyna kóp qoldaý kórsetip kele jatqan oblys ákimine alǵysyn bildirdi.
"Adyrna" ulttyq portaly.
