اتىراۋ وبلىسىنىڭ اكىمى ماحامبەت دوسمۇحامبەتوۆ جاپونيا ەلىنىڭ توكيو قالاسىندا وتكەن 16-شى جازعى پاراليمپياداعا قاتىسقان جەرلەستەرىمىزدى ماراپاتتادى.
ەل ابىرويىن اسقاقتاتقان جۇلدەگەرلەرلەردىڭ ارقايسىسىنا ەكى بولمەلى پاتەر مەن اۆتوكولىك كىلتى تابىستالدى. سونداي-اق، پارادزيۋدودان قازاقستان رەسپۋبليكاسىنىڭ باس جاتتىقتىرۋشىسى جاندوس قيانوۆقا 4 ميلليون تەڭگە، وزگە دە اتالعان دوداعا قاتىسۋشىلارعا 1 ميلليون تەڭگەلىك سەرتيفيكاتتار تابىستالدى.
جەرلەستەرىمىز ەلگە ورالعاندا وبلىس اكىمدىگى بۇعان دەيىن دە ءار سپورتشىعا 1 ميلليون تەڭگەنىڭ سياپاتىن جاساعان بولاتىن.
ەل قۇراماسى ساپىنداعى 8 اتىراۋلىق سپورتشىنىڭ 3-ءۋى ەل قورجىنىنا كۇمىس جۇلدە سالعان ەدى.
ولار پارادزيۋدوشىلار: ءانۋار ساريەۆ، تەمىرجان داۋلەت جانە زارينا بايباتينا. ال، امانجول جانبوتا وسى سپورت تۇرىنەن 5-ورىندى، نۇرلان دومباەۆ پاراتاەكۆوندودان 5-ورىندى، ەرجان سالىمگەرەەۆ پاراجۇزۋدەن 6-ورىندى يەلەندى.
«سىزدەر قازاقستاننىڭ پاراسپورتى دامۋىنىڭ جاڭا ءداۋىرى باستالعانىن كورسەتتىڭىزدەر.
بۇل – قاجىرلى ەڭبەك پەن بيىك نامىستىڭ، ءورشىل رۋھتىڭ جەڭىسى.ەرجان سالىمگەرەۆ پەن نۇرلان دومباەۆتىڭ العاشقى قاتىسقان پاراليمپياداسىنان 5-6-شى ورىن الۋىنىڭ ءوزى — ايتۋلى جەتىستىك! ءاربىر اتىراۋلىق پاراسپورتشى التىن مەدالگە لايىق ونەر كورسەتتى. سىزدەردىڭ ارقايسىڭىز جەڭىمپازسىزدار!" دەدى ايماق باسشىسى ماحامبەت دوسمۇحامبەتوۆ.
پارادزيۋدودان قازاقستان رەسپۋبليكاسىنىڭ باس جاتتىقتىرۋشىسى جاندوس قيانوۆ توكيو تورىندە سپورتشىلارىمىزدىڭ لايىقتىقتى ونەر كورسەتكەنىن اتاپ ءوتتى.
ال، ەل قورجىنىنا العاشقى كۇمىس مەدال سىيلاعان پارادزيۋدوشىمىز ءانۋار ساريەۆ جەڭىستىڭ وڭايعا تۇسپەگەنىن ايتتى.
«العان مەدالىمدى قازاقستان رەسپۋبليكاسىنىڭ 30 جىلدىعىنا ارنايمىن. بىزگە قولداۋ بىلدىرگەن اربىرىڭىزگە العىس ايتامىن»،-دەدى جۇلدەگەر.
