الماتىدا "شاڭىراق" ىقشام اۋدانىنىڭ 40 جاسار تۇرعىنى 12 ميلليون تەڭگەگە بوپسالادى دەگەن كۇدىكپەن ۇستالدى، دەپ حابارلايدى "ادىرنا" ۇلتتىق پورتالى.
پوليتسياعا 23 جاستاعى ازاماتشا ن. جۇگىندى، ول اناسىنىڭ تانىسى الەۋمەتتىك جەلىگە ينتيمدىك سيپاتتاعى فوتو مەن ۆيدەولاردى جاريالايمىن دەپ قورقىتىپ، بوپسالاۋ ارقىلى 12 ملن تەڭگە تالاپ ەتكەن.
الماتى قالالىق ءىىد ءباسپاسوز قىزمەتى
الماتى كريمينالدىق پوليتسيا دەپارتامەنتىنىڭ باستىعى قۋاتبەك ناۋاتوۆتىڭ ايتۋىنشا، بۇل فاكت قازاقستان رەسپۋبليكاسىنىڭ قىلمىستىق كودەكسىنىڭ 194ب. (بوپسالاۋ) سايكەس كەلىپ وتىر.
جەدەل-ىزدەستىرۋ شارالارى بارىسىندا كۇدىكتى ۇستالىپ، ۋاقىتشا ۇستاۋ يزولياتورىنا قامالدى. ول بۇل زاڭسىز ارەكەتتەردىڭ ناتيجەسىندە تانىسىنان سۇرالعان سومانىڭ ءبىر بولىگىن الۋعا قول جەتكىزگەنىن مويىندادى. تەرگەۋ جالعاسۋدا، - دەپ ءتۇسىندىردى ول.
كريمينالدىق پوليتسيانىڭ مالىمەتىنشە، بۇرىن ەر ادام بوتەن بىرەۋدىڭ مۇلكىن ۇرلاعانى ءۇشىن قىلمىستىق جاۋاپكەرشىلىككە تارتىلعان.
"ادىرنا" ۇلتتىق پورتالى
