«Biz mıllıoner emespiz!». Aqtóbeniń Prıgorodnyı aýylynyń turǵyndary ákimnen avtobýs máselesin sheship berýdi suraıdy. Áıtpese, taksı júrgizýshilerine jem boldyq dep otyr. Qoǵamdyq kólik durys qatynamaıtynyn bilip alǵan kóliktegiler baǵany aspandatyp jibergen. Kún saıyn qalaǵa qatynaý úshin kemi 5000 teńge suraıtyn kórinedi. Aýyldyqtardyń bazynasyn tyńdap kelgen Aqbaıan Sultanmuratova jalǵastyrady.
Bul týraly «Eýrazııa» birinshi arnasy habarlaıdy.
Prıgorodnyı eldi mekeni qaladan 15 shaqyrym jerde. Aqtóbeniń Almaty aýdanyna qaraıdy. Turǵyndar qoǵamdyq kólikten kúder úzgen. Aınaldyrǵan eki avtobýs úsh myń halqy bar aýylǵa azdyq etedi degen jurt, onyń ózi ýaqytyly júrmeıtinine ashynady.
NAZIRA DOSJANOVA, PRIGORODNYI AÝYLYNYŃ TURǴYNY: «Bir saǵat, saǵat jarym, keıde tipti synyp qalǵanda eki saǵatqa deıin barady. Qaladaǵy jumysqa baratyn balalarymyz keshigip barady, únemi taksımen bara almaıdy, aqsha az».
Avtobýs kútip sharshaǵan jurt amalsyz taksı shaqyrady eken. Kúndiz taksıler adam basyna bir baǵytqa 500 teńge alsa, jeke bir óziń taksı jaldaý qymbatqa túsedi.
AINAGÚL TYNYShTYQQYZY, PRIGORODNYI AÝYLYNYŃ TURǴYNY: «Men kajdyı balaǵa «Indraıvermen» shaqyram, 2000-2500-ǵa kelmeıdi tipti. Olar sosyn jolǵa shyǵady, keıde bolady túıip ketedi».
Prıgorodnyıdaǵylar kórshi aýyldyń avtobýsymen qatynap ta kóripti, biraq, onyń óz jolaýshylary bar, ári aýylǵa soqpaıdy dep otyr. Jınalǵan jurt ákimnen aýylǵa júretin avtobýstardyń júrý ýaqytyn retteýdi suraıdy. Baǵytqa kúnine 4-5 avtobýs shyǵarsa, jaǵdaı túzeler edi dep sanaıdy. Al eki avtobýstyń árqaısysy aýylǵa kúnine 6 ret qatynaıdy eken.
- Interval qansha?
- 1 saǵat.
- Negizgi talap sondaı ma?
- Joq endi...
- Keıde eki saǵat kútip qalamyz deıdi...
- Bolady shyǵar, bilmedim ol jaǵyn. 2 saǵat bolmaıdy, ótirik aıta beredi.
- Nege eki-aq avtobýs?
- Endi jetpeı jatqan shyǵar, qaıdan bileıin?
Ákim-qaralar halyqtyń shaǵymynan habardar. Alaıda, qoǵamdyq kólik máselesine qalalyq ákimdik jaýapty, biz tek aryzdy jetkizýshimiz dep otyr.
AMANBEK ShALABAEV, ALMATY AÝDANY ÁKIMDIGI TURǴYN ÚI-KOMMÝNALDYQ ShARÝAShYLYQ BÓLIMINIŃ BASShYSY: «Qoǵamdyq kólik jóninde grafıktiń saqtalmaýy, ýaqytynda júrmeýi sol boıynsha qalalyq JKH jáne avtodorogı bólimine hat túrinde habarlap otyrmyz: Kólik sanyn kóbeıtý jáne grafık saqtalý kerek».
Qala ákiminiń orynbasary №29 baǵyttaǵy ıntervaldy azaıtý maqsatynda avtobýs sanyn kóbeıtetindikterin aıtty. Ol úshin tasymaldaýshy mekemege usynys aıtypty. Qazan aıynan bastap baǵytqa 7 avtobýs shyǵatyn bolady.
"Adyrna" ulttyq portaly
