ماڭعىستاۋ وبلىسى تۇششىقۇدىق اۋىلىنىڭ تۇرعىنى داريعا بولاتباي ابۋ-دابيدەگى New York ۋنيۆەرسيتەتىنىڭ تەگىن ءبىلىم گرانتىن جەڭىپ الدى دەپ حابارلايدى "ادىرنا" ۇلتتىق پورتالى.
ماڭعىستاۋ وبلىسى ماڭعىستاۋ اۋدانى اكىمدىگىنىڭ ءباسپاسوز قىزمەتى ءمالىم ەتكەندەي، داريعا بولاتباي العاشىندا تۇششىقۇدىق اۋىلىنداعى س.جاڭعابىلوۆ مەكتەبىندە وقىعان. كەيىن اقتاۋداعى نازارباەۆ زياتكەرلىك ءبىلىم ورداسىنا ءتۇسىپ، بيىل 12 سىنىپتى ۇزدىك اياقتاعان. ورىس، اعىلشىن تىلدەرىن تەرەڭ مەڭگەرە وتىرىپ، مەكتەپتىڭ قوعامدىق جۇمىستارىندا بەلسەندىلىك تانىتقان دارىندى قىز بيىل ابۋ-دابيدەگى New York ۋنيۆەرسيتەتىندە وقۋعا گرانت جەڭىپ الىپتى.
— تمد بويىنشا ەڭ تانىمال وقۋ ورىندارىنىڭ ءبىرى سانالاتىن ۋنيۆەرسيتەت تۋرالى 10-سىنىپ وقىپ جۇرگەندە ەستىدىم. ابۋ-دابيدەگى New York ۋنيۆەرسيتەتى اقش-تاعى New York زەرتتەۋ ۋنيۆەرسيتەتىنىڭ ءبىر ءبولىمى ەكەن. شىنىمدى ايتسام، شەت مەملەكەتكە وقۋعا تۇسەمىن دەپ مۇلدەم ويلامادىم. دەگەنمەن باعىمدى سىناپ كوردىم. مۇنداعى ەڭ باستى تالاپ — ەسسە جازۋ. ءبىرى ءومىربايانىڭدى، ەندى ەكىنشىسى «سەن نەگە وسى ۋنيۆەرسيتەتتى تاندايسىڭ؟» دەگەن تاقىرىپتا بولدى. سول ەسسە مەنىڭ گرانتقا تۇسۋىمە كوپ اسەر ەتتى. كارانتين ۋاقىتىنداعى قيىندىققا قاراماستان، ونلاين تىلدەسۋ سۇحباتىنان دا ءساتتى ءوتتىم. بىرنەشە كۇننەن كەيىن وقۋعا شاقىرتۋ كەلدى، - دەيدى داريعا بولاتباي.
ايتا كەتۋ كەرەك، اتالعان وقۋ ورنىندا الەم بويىنشا اعىلشىن ءتىلىن جەتىك بىلەتىن ستۋدەنتتەردىڭ 4 پايىزى عانا وقۋعا جولداما الادى ەكەن. بيىل 100 مىڭنان استام وقۋشى قۇجات تاپسىرعان بولسا، سونىڭ 500-ءى وقۋعا قابىلدانعان.
—7-سىنىپتا نازارباەۆ زياتكەرلىك مەكتەبىنە وقۋعا ءتۇستىم. باستاپقىدا ورىس، اعىلشىن ءتىلىن مۇلدەم بىلمەدىم. اعىلشىن ءتىلىن مەڭگەرتەتىن كۋرستارعا قاتىسپاي-اق ءوز بەتىمشە ۇيرەنۋگە بەل بۋدىم. مەكتەپ ومىرىنە بەلسەندى ارالاسىپ، عىلىمي جوبالارعا قاتىسا باستادىم. ءار وبلىستا وتەتىن ءبىلىم سايىستارىنا بارىپ، فرانتسياداعى حالىقارالىق عىلىمي جوباعا جولداما الدىم. ءبىلىمنىڭ تاسىن قالاعان تۇششىقۇدىق اۋىلىمداعى س.جاڭعابىلوۆ مەكتەبى بولسا، نازارباەۆ مەكتەبى ارمانىڭا قول جەتكىزۋ ءوز قولىڭدا ەكەنىن ۇيرەتتى، — دەيدى دارىندى تۇلەك.
وسىلايشا ەلباسى مەدالىنىڭ قولا، رەسپۋبليكالىق وليمپيادانىڭ كۇمىس جۇلدەگەرى، بيىل «جىل وقۋشىسى-2021» اتالىمىن يەلەنگەن داريعا بولاتباي ەندى ابۋ-دابيدە ءبىلىم الاتىن بولادى.
بولاشاقتا ول بىلىكتى دارىگەر اتانىپ، قازاق ەلىنىڭ مەديتسينا سالاسىنا تىڭ جاڭالىق اكەلۋدى ارماندايدى. جاس دارىنعا ءبىز دە زور جەتىستىكتەر مەن تولاعاي تابىستار تىلەيمىز.
"ادىرنا" ۇلتتىق پورتالى.
