Mańǵystaý oblysy Tuyqudyq aýylynyń turǵyny Darıǵa Bolatbaı Abý-Dabıdegi New York ýnıversıtetiniń tegin bilim grantyn jeńip aldy dep habarlaıdy "Adyrna" ulttyq portaly.
Mańǵystaý oblysy Mańǵystaý aýdany ákimdiginiń baspasóz qyzmeti málim etkendeı, Darıǵa Bolatbaı alǵashynda Tuyqudyq aýylyndaǵy S.Jańǵabylov mektebinde oqyǵan. Keıin Aqtaýdaǵy Nazarbaev zııatkerlik bilim ordasyna túsip, bıyl 12 synypty úzdik aıaqtaǵan. Orys, aǵylshyn tilderin tereń meńgere otyryp, mekteptiń qoǵamdyq jumystarynda belsendilik tanytqan daryndy qyz bıyl Abý-Dabıdegi New York ýnıversıtetinde oqýǵa grant jeńip alypty.
— TMD boıynsha eń tanymal oqý oryndarynyń biri sanalatyn ýnıversıtet týraly 10-synyp oqyp júrgende estidim. Abý-Dabıdegi New York ýnıversıteti AQSh-taǵy New York zertteý ýnıversıtetiniń bir bólimi eken. Shynymdy aıtsam, shet memleketke oqýǵa túsemin dep múldem oılamadym. Degenmen baǵymdy synap kórdim. Mundaǵy eń basty talap — esse jazý. Biri ómirbaıanyńdy, endi ekinshisi «Sen nege osy ýnıversıtetti tandaısyń?» degen taqyrypta boldy. Sol esse meniń grantqa túsýime kóp áser etti. Karantın ýaqytyndaǵy qıyndyqqa qaramastan, onlaın tildesý suhbatynan da sátti óttim. Birneshe kúnnen keıin oqýǵa shaqyrtý keldi, - deıdi Darıǵa Bolatbaı.
Aıta ketý kerek, atalǵan oqý ornynda álem boıynsha aǵylshyn tilin jetik biletin stýdentterdiń 4 paıyzy ǵana oqýǵa joldama alady eken. Bıyl 100 myńnan astam oqýshy qujat tapsyrǵan bolsa, sonyń 500-i oqýǵa qabyldanǵan.
—7-synypta Nazarbaev zııatkerlik mektebine oqýǵa tústim. Bastapqyda orys, aǵylshyn tilin múldem bilmedim. Aǵylshyn tilin meńgertetin kýrstarǵa qatyspaı-aq óz betimshe úırenýge bel býdym. Mektep ómirine belsendi aralasyp, ǵylymı jobalarǵa qatysa bastadym. Ár oblysta ótetin bilim saıystaryna baryp, Franııadaǵy halyqaralyq ǵylymı jobaǵa joldama aldym. Bilimniń tasyn qalaǵan Tuyqudyq aýylymdaǵy S.Jańǵabylov mektebi bolsa, Nazarbaev mektebi armanyńa qol jetkizý óz qolyńda ekenin úıretti, — deıdi daryndy túlek.
Osylaısha Elbasy medaliniń qola, respýblıkalyq olımpıadanyń kúmis júldegeri, bıyl «Jyl oqýshysy-2021» atalymyn ıelengen Darıǵa Bolatbaı endi Abý-Dabıde bilim alatyn bolady.
Bolashaqta ol bilikti dáriger atanyp, qazaq eliniń medıına salasyna tyń jańalyq ákelýdi armandaıdy. Jas darynǵa biz de zor jetistikter men tolaǵaı tabystar tileımiz.
"Adyrna" ulttyq portaly.
