بۇگىن ماڭعىستاۋلىقتار مەملەكەت باسشىسىنىڭ جولداۋىن ىسكە اسىرۋ باعىتتارىن بەلگىلەدى. وبلىس اكىمى سەرىكباي ترۇموۆ وڭىردە اتقارىلاتىن مىندەتتەردى ناقتىلاپ، ولاردى جەرگىلىكتى دەڭگەيدە ىسكە اسىرۋ ءۇشىن جاۋاپتى تۇلعالارعا ءتيىستى تاپسىرمالار جۇكتەدى دەپ حابارلايدى "ادىرنا" ۇلتتىق پورتالى.
مەملەكەت باسشىسى بەلگىلەگەن ءبىرىنشى مىندەت – پاندەميادان كەيىنگى ەل ەكونوميكاسىن دامىتۋ. بۇل باعىتتا ءوڭىر ەكونوميكاسىن ءارتاراپتاندىرۋ بويىنشا جۇيەلى جۇمىس جاسالۋدا. نەگىزىنەن وڭدەۋ ونەركاسىبى، تۋريزم، قۇرىلىس، اۋىل شارۋاشىلىعى مەن كولىك جانە لوگيستيكا سالالارىن دامىتۋعا باسىمدىق بەرىلۋدە.
— ءبىز 2025 جىلعا قاراي وبلىستاعى وڭدەۋ ونەركاسىبىنىڭ كولەمىن 254,3 ملرد تەڭگەگە دەيىن ارتتىرۋدى جوسپارلاپ وتىرمىز، — دەگەن وبلىس اكىمى كوزدەلگەن مەجەگە قول جەتكىزۋ ءۇشىن ءوڭىر ەكونوميكاسىنا تىكەلەي ينۆەستيتسيا تارتۋ، وڭدەۋ ونەركاسىبىن دامىتۋ بويىنشا جۇمىستاردى جالعاستىرۋدى تاپسىردى.
وبلىسقا ينۆەستور قارجىسىن تارتۋدا اقتاۋ ارنايى ەكونوميكالىق ايماعىنىڭ ۇلەسى زور. ارنايى ەكونوميكالىق ايماعى اشىلعالى 200 ملرد تەڭگەدەن استام ينۆەستيتسيا قۇيىلدى. بۇگىندە بۇل ايماقتا 19 ءوندىرىس وشاعى جۇمىس ىستەپ تۇر. وندا 1800-گە تارتا ادام ەڭبەك ەتۋدە. الداعى ۋاقىتتا شەتەلدىك جانە وتاندىق ينۆەستورلاردىڭ قاتىسۋىمەن تاعى 14 جوبا جۇزەگە اسىرىلماق. ونىڭ 5-ءى بيىل ىسكە قوسىلادى.
پرەزيدەنت جولداۋى ماڭعىستاۋدا جاڭا كەن ورىندارىنىڭ اشىلۋىنا دا تىڭ سەرپىن بەرەتىن بولدى. مەملەكەت باسشىسى گەولوگيالىق بارلاۋ جانە جەر قويناۋىن كەشەندى زەرتتەۋدى تاپسىردى.
وبلىس اكىمىنىڭ ايتۋىنشا، بۇل باعىتتا وزەن، جەتىباي، قالامقاس جانە تاعى دا باسقا كەن ورىندارىندا گەولوگيالىق بارلاۋ جۇمىستارى جۇرگىزىلمەك. اتالعان باستاما بۇگىندە وبلىستا ازىرلەنىپ جاتقان الەۋمەتتىك-ەكونوميكالىق دامۋ كەشەندى جوسپارىنا ەندى.
— بۇل ايماقتاعى مۇناي قورىن انىقتاۋعا، مۇناي مەن گاز ءوندىرۋ كولەمىن ۇلعايتۋعا جانە مۇناي كومپانيالارىنا قىزمەت كورسەتەتىن مەكەمەلەردىڭ جۇمىس كولەمىن ارتتىرۋعا مۇمكىندىك بەرەدى،-دەدى س.ترۇموۆ.
ەلىمىزدە 2030 جىلعا قاراي سۋ تاپشىلىعىنىڭ كولەمى 40 پايىزعا جەتۋى مۇمكىن. اتالعان ماسەلەنىڭ الدىن الۋ ءۇشىن پرەزيدەنت جاڭا جولداۋىندا اتقارۋشى ورگاندارعا ناقتى تاپسىرمالار جۇكتەدى. مەملەكەت باسشىسى "استراحان-ماڭعىستاۋ" ماگيسترالدى سۋ قۇبىرىنىڭ جاڭعىرتىلاتىنىن جانە كەندىرلىدە سۋ تۇششىتۋ زاۋىتىن سالۋ قاجەتتىگىن ايتتى.
وبلىس اكىمى س.ترۇموۆتىڭ ايتۋىنشا، قازىر بۇل زاۋىتتىڭ جوبالىق-سمەتالىق قۇجاتتاماسى جاساقتالۋدا. قۇنى 87 ملرد.تەڭگە بولاتىن جوبا تاۋلىگىنە 50 مىڭ تەكشە مەتر سۋ تۇششىتادى دەپ جوسپارلانىپ وتىر. كاسىپورىن ىسكە قوسىلعاندا جاڭاوزەن قالاسى تۇرعىندارىن تازا اۋىز سۋمەن قامتىپ، قالانىڭ تىرشىلىك نارىنە دەگەن سۇرانىسىن تولىق وتەمەك.
— كوپتەن كۇتكەن ماسەلەنىڭ شەشىلۋىنە جول اشقان مەملەكەت باسشىسىنا ماڭعىستاۋ جۇرتشىلىعىنىڭ اتىنان العىس ايتامىن،-دەدى ءوڭىر باسشىسى.
وتكەن جىلى وبلىس اكىمىنىڭ باستاماسىمەن جاز ايلارىندا تۋىندايتىن سۋ تاپشىلىعىن بولدىرماس ءۇشىن 5 جىلدىق جوسپار قابىلداندى. اقتاۋ قالاسى جانە وعان ىرگەلەس ورنالاسقان مۇنايلى، قاراقيا اۋداندارىنىڭ اۋىلدارىن اۋىز سۋمەن جەتكىلىكتى دەڭگەيدە قامتاماسىز ەتۋ ماقساتىندا "كاسپي" سۋ تۇششىتۋ زاۋىتىنىڭ قۋاتىن ەكى ەسە ياعني 40 مىڭ تەكشە مەترگە دەيىن ۇلعايتۋ كوزدەلگەن ەدى. قازىر جۇمىس قارقىندى جۇرگىزىلۋدە. جوبانى 2022 جىلدىڭ باسىندا اياقتاۋ جوسپارلانعان.
"قازمۇنايگاز" ۇلتتىق كومپانياسى "قاراجانباس" كەن ورنىندا تاۋلىگىنە 17 مىڭ تەكشە مەتر سۋ تۇششىتاتىن زاۋىت سالىپ جاتىر. بۇل زاۋىت بيىل جىل سوڭىنا ىسكە قوسىلادى دەپ كۇتىلۋدە. وندىرىستەن اۋىسقان سۋ تۇرعىنداردىڭ قاجەتىنە الىناتىن بولادى.
"ماەك-قازاتومونەركاسىپ" جشس-نا قاراستى تاۋلىگىنە 24 مىڭ تەكشە مەتر سۋ تۇششىتاتىن قوندىرعىسىن سالۋ جوسپارلانعان. قازىر جوبالىق-سمەتالىق قۇجاتتاماسى جاساقتالۋدا. قۇجات تولىق راسىمدەلىپ بىتكەننەن كەيىن، جوبانى كەلەر جىلى باستاۋ كوزدەلۋدە.
فورت-شەۆچەنكو قالاسىندا قۋاتى تاۋلىگىنە 5 مىڭ تەكشە مەتردى قۇرايتىن سۋ تۇششىتۋ قوندىرعىسىن NKOK كومپانياسىنىڭ وبلىس ءۇشىن الەۋمەتتىك قولداۋ اياسىندا ىسكە اسىرۋ جوسپارلانىپ وتىر. ءدال وسىنداي جوبا اقشۇقىر جانە سايىن شاپاعاتوۆ ەلدى مەكەندەرىندە دە سالىنادى.
— قۇيىلىس - مۇنايلى – اقتاۋ باعىتىندا جاڭا سۋ قۇبىرى تارتىلادى. وڭىردەگى سۋ كوزدەرىن ىزدەستىرۋ-زەرتتەۋ جۇمىستارى قولعا الىندى. بۇل الداعى جىلدارى وبلىس جۇرتشىلىعىن سۋمەن قامتۋ ءۇشىن ناقتى شارالار قابىلداۋعا مۇمكىندىك بەرەدى دەگەن سەنىمدەمىز،-دەدى وبلىس اكىمى س.ترۇموۆ.
جولداۋدا مەملەكەت باسشىسى حالقىمىزدىڭ ءال-اۋقاتىن ارتتىرۋعا ارنالاتىن 5 نەگىزگى باستامانى بەلگىلەدى. 2022 جىلدىڭ 1 قاڭتارىنان باستاپ ەڭ تومەنگى جالاقى مولشەرى 42 500 تەڭگەدەن 60 مىڭ تەڭگەگە دەيىن كوبەيەتىن بولدى. ەڭبەكاقىنىڭ ءوسۋى 19365 ماڭعىستاۋلىق تۇرعىنعا وڭ اسەرىن تيگىزبەك.
سونىمەن قاتار ماڭعىستاۋ وبلىسى بويىنشا 52 مىڭنان استام ازاماتتىق قىزمەتشىلەردىڭ (مادەنيەت قىزمەتكەرلەرىنىڭ، مۇراعاتشىلاردىڭ، كىتاپحاناشىلاردىڭ، تەحنيكالىق قىزمەتكەرلەردىڭ، قورىقشىلاردىڭ، كولىك جۇرگىزۋشىلەرىنىڭ) ەڭبەكاقىسى 2022 جىلدان 2025 جىلعا دەيىن 20 پايىزعا وسەتىن بولدى.
ءسوزىنىڭ سوڭىندا س.ترۇموۆ ماڭعىستاۋلىقتاردى جاڭا جولداۋدى جۇدىرىقتاي جۇمىلا جۇزەگە اسىرۋعا شاقىردى.
"ادىرنا" ۇلتتىق پورتالى.
