اقتوبە وبلىسىنىڭ اكىمى وڭداسىن ءورازاليننىڭ توراعالىعىمەن مەملەكەت باسشىسى قاسىم-جومارت توقاەۆتىڭ «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» اتتى جولداۋىن جۇزەگە اسىرۋعا بايلانىستى جيىن ءوتتى دەپ حابارلايدى "ادىرنا" ۇلتتىق پورتالىنىڭ ءتىلشىسى.
جيىنعا وبلىستىق مەملەكەتتىك ورگانداردىڭ باسشىلارى، وبلىستىق قوعامدىق كەڭەس وكىلدەرى، ارداگەرلەر قاتىستى.
— مەملەكەت باسشىسى بيىلعى قازاقستان حالقىنا جولداۋىندا ەلىمىز ءۇشىن وزەكتى بولىپ تابىلاتىن بارلىق سۇراقتى قامتىدى. نەگىزگى مىندەتتەردىڭ ءبىرى – پاندەميادان كەيىنگى كەزەڭدە ەكونوميكالىق ءوسىمدى قامتاماسىز ەتۋ، — دەگەن وبلىس اكىمى ستراتەگيالىق قۇجاتتىڭ نەگىزگى باسىمدىقتارى مەن پرەزيدەنت قويعان اۋقىمدى مىندەتتەردى ىسكە اسىرۋ جولدارىنا توقتالدى.
پرەزيدەنت تاپسىرماسىن ورىنداۋ ماقساتىندا وڭىردە COVID-19-عا قارسى ەكپە تۋرالى جالعان اقپاراتپەن كۇرەس جۇمىستارى كۇشەيتىلەتىن بولادى.
ايتا كەتەيىك، بۇگىندە كوروناۆيرۋسقا قارسى ەكپەنىڭ ءبىرىنشى كومپونەنتىمەن 285 مىڭ ادام، ەكىنشى كومپونەنتپەن 228 مىڭنان اسا ادام ەگىلگەن. سونداي-اق، بيۋدجەت قاراجاتىن ءتيىمدى پايدالانۋ، اۋىل اۋماقتارىن دامىتۋ جانە حالىقتىڭ قاتىسۋ بيۋدجەتىن ەنگىزۋ، كۆازيمەملەكەتتىك سەكتور كاسىپورىندارىن جەكەشەلەندىرۋ، شاعىن جانە ورتا بيزنەستىڭ دامۋىن جەدەلدەتۋ، ءبىلىم بەرۋ سالاسىن دامىتۋ جانە ت.ب. مىندەتتەر قويىلدى.
پرەزيدەنتتىڭ ازاماتتاردىڭ ءال-اۋقاتىن جاقسارتۋ بويىنشا تاپسىرماسى اياسىندا 2022 جىلدىڭ 1 قاڭتارىنان باستاپ ەڭ تومەن ەڭبەكاقى مولشەرى 42500 تەڭگەدەن 60 مىڭ تەڭگەگە دەيىن وسەدى.
وبلىس اكىمىنىڭ ءبىرىنشى ورىنباسارى رۋسلان حامباروۆتىڭ ايتۋىنشا، اتالمىش شارا تابىسىن جوعالتۋىنا بايلانىستى، سونىڭ ىشىندە ءبىر جاسقا دەيىنگى بالا كۇتىمىنە بايلانىستى الەۋمەتتىك تولەم العان ازاماتتارعا تىكەلەي قاتىستى بولادى.
بۇقارالىق جانە بالالار سپورتىمەن شۇعىلدانۋعا جاعداي جاساۋ جۇمىستارى جانداندىرىلادى.بۇگىندە وبلىس تۇرعىندارىنىڭ 32,24 %-ى دەنە شىنىقتىرۋمەن جانە سپورتپەن اينالىسادى. قازىرگى تاڭدا قارعالى، تەمىر اۋداندارىندا جانە حرومتاۋ، قاندىاعاش قالالارىندا 5 دەنە شىنىقتىرۋ-ساۋىقتىرۋ كەشەنىنىڭ قۇرىلىسى جالعاسۋدا. سونداي-اق بيىل مۇمكىندىگى شەكتەۋلى جاندارعا ارنالعان سپورت كەشەنىن جانە جارقامىس، جارلى، جاعابۇلاق اۋىلدارىندا انگار تيپىندەگى 3 سپورت كەشەنىن سالۋ جوسپارلانىپ وتىر.
«سامۇرىق-قازىنا-ءتراستتىڭ» قولداۋىمەن مۇعالجار اۋدانىنىڭ ەمبى قالاسىندا دەنە شىنىقتىرۋ-ساۋىقتىرۋ كەشەنىن سالۋ باستالدى. سونىمەن قاتار اقتوبە قالاسىنداعى ورتالىق ستاديون مەن «حيميك» ستاديونىن قالپىنا كەلتىرۋ ءۇشىن جوبالىق-سمەتالىق قۇجاتتامالار ازىرلەنىپ جاتىر. وسىلايشا بيىل تەك قالاداعى عانا ەمەس، وبلىستاعى بارلىق ءىرى اۋىلداردى سپورت عيماراتتارىمەن قامتۋ جوسپاردا بار.
تسيفرلاندىرۋدى دامىتۋ اياسىندا وبلىس ورتالىعىندا 79 اپپاراتتىق-باعدارلامالىق كەشەن مەن 2600 سىرتقى بەينە باقىلاۋ كامەرالارىن ورناتا وتىرىپ، «اقتوبە قاۋىپسىز قالا» ىزدەستىرۋ-ساراپتاۋ كەشەنىن ەنگىزۋ جوسپارلانۋدا. بۇل شارا تۇرعىنداردىڭ قاۋىپسىزدىگىن كوتەرۋگە، وڭىردەگى اپات پەن قىلمىس دەڭگەيىن ازايتۋعا مۇمكىندىك بەرەدى.
ايتا كەتۋ كەرەك، بۇگىندە 250 ادامنان اساتىن تۇرعىنى بار ەلدى مەكەندەردى ينتەرنەتپەن قامتۋ اياسىندا، وڭىردەگى 100 اۋىلدىڭ 98-ءى «3G» موبيلدىك ينتەرنەتىمەن قامتىلعان، قالعان ەكى اۋىل بويىنشا جۇمىستار جۇرگىزىلۋدە.
وڭداسىن ورازالين الداعى ۋاقىتتا مەملەكەت باسشىسىنىڭ جولداۋىندا ايتىلعان ماقسات-مىندەتتەردى ويداعىداي ورىنداۋ قاجەتتىگىن اتاپ ءوتتى.
— ول ءۇشىن بىزدە بارلىق جاعداي بار. تەك قاتاڭ باقىلاۋدى قامتاماسىز ەتە وتىرىپ، جاۋاپكەرشىلىكپەن جۇمىس ىستەۋ كەرەك،— دەدى وبلىس اكىمى.
"ادىرنا" ۇلتتىق پورتالى.
