Aqtóbe oblysynyń ákimi Ońdasyn Orazalınniń tóraǵalyǵymen Memleket basshysy Qasym-Jomart Toqaevtyń «Halyq birligi jáne júıeli reformalar – el órkendeýiniń berik negizi» atty Joldaýyn júzege asyrýǵa baılanysty jıyn ótti dep habarlaıdy "Adyrna" ulttyq portalynyń tilshisi.
Jıynǵa oblystyq memlekettik organdardyń basshylary, oblystyq qoǵamdyq keńes ókilderi, ardagerler qatysty.
— Memleket basshysy bıylǵy Qazaqstan halqyna Joldaýynda elimiz úshin ózekti bolyp tabylatyn barlyq suraqty qamtydy. Negizgi mindetterdiń biri – pandemııadan keıingi kezeńde ekonomıkalyq ósimdi qamtamasyz etý, — degen oblys ákimi strategııalyq qujattyń negizgi basymdyqtary men Prezıdent qoıǵan aýqymdy mindetterdi iske asyrý joldaryna toqtaldy.
Prezıdent tapsyrmasyn oryndaý maqsatynda óńirde COVID-19-ǵa qarsy ekpe týraly jalǵan aqparatpen kúres jumystary kúsheıtiletin bolady.
Aıta keteıik, búginde koronavırýsqa qarsy ekpeniń birinshi komponentimen 285 myń adam, ekinshi komponentpen 228 myńnan asa adam egilgen. Sondaı-aq, bıýdjet qarajatyn tıimdi paıdalaný, aýyl aýmaqtaryn damytý jáne halyqtyń qatysý bıýdjetin engizý, kvazımemlekettik sektor kásiporyndaryn jekeshelendirý, shaǵyn jáne orta bıznestiń damýyn jedeldetý, bilim berý salasyn damytý jáne t.b. mindetter qoıyldy.
Prezıdenttiń azamattardyń ál-aýqatyn jaqsartý boıynsha tapsyrmasy aıasynda 2022 jyldyń 1 qańtarynan bastap eń tómen eńbekaqy mólsheri 42500 teńgeden 60 myń teńgege deıin ósedi.
Oblys ákiminiń birinshi orynbasary Rýslan Hambarovtyń aıtýynsha, atalmysh shara tabysyn joǵaltýyna baılanysty, sonyń ishinde bir jasqa deıingi bala kútimine baılanysty áleýmettik tólem alǵan azamattarǵa tikeleı qatysty bolady.
Buqaralyq jáne balalar sportymen shuǵyldanýǵa jaǵdaı jasaý jumystary jandandyrylady.Búginde oblys turǵyndarynyń 32,24 %-y dene shynyqtyrýmen jáne sportpen aınalysady. Qazirgi tańda Qarǵaly, Temir aýdandarynda jáne Hromtaý, Qandyaǵash qalalarynda 5 dene shynyqtyrý-saýyqtyrý kesheniniń qurylysy jalǵasýda. Sondaı-aq bıyl múmkindigi shekteýli jandarǵa arnalǵan sport keshenin jáne Jarqamys, Jarly, Jaǵabulaq aýyldarynda angar tıpindegi 3 sport keshenin salý josparlanyp otyr.
«Samuryq-Qazyna-Trasttiń» qoldaýymen Muǵaljar aýdanynyń Embi qalasynda dene shynyqtyrý-saýyqtyrý keshenin salý bastaldy. Sonymen qatar Aqtóbe qalasyndaǵy Ortalyq stadıon men «Hımık» stadıonyn qalpyna keltirý úshin jobalyq-smetalyq qujattamalar ázirlenip jatyr. Osylaısha bıyl tek qaladaǵy ǵana emes, oblystaǵy barlyq iri aýyldardy sport ǵımarattarymen qamtý josparda bar.
ıfrlandyrýdy damytý aıasynda oblys ortalyǵynda 79 apparattyq-baǵdarlamalyq keshen men 2600 syrtqy beıne baqylaý kameralaryn ornata otyryp, «Aqtóbe qaýipsiz qala» izdestirý-saraptaý keshenin engizý josparlanýda. Bul shara turǵyndardyń qaýipsizdigin kóterýge, óńirdegi apat pen qylmys deńgeıin azaıtýǵa múmkindik beredi.
Aıta ketý kerek, búginde 250 adamnan asatyn turǵyny bar eldi mekenderdi ınternetpen qamtý aıasynda, óńirdegi 100 aýyldyń 98-i «3G» mobıldik ınternetimen qamtylǵan, qalǵan eki aýyl boıynsha jumystar júrgizilýde.
Ońdasyn Orazalın aldaǵy ýaqytta Memleket basshysynyń Joldaýynda aıtylǵan maqsat-mindetterdi oıdaǵydaı oryndaý qajettigin atap ótti.
— Ol úshin bizde barlyq jaǵdaı bar. Tek qatań baqylaýdy qamtamasyz ete otyryp, jaýapkershilikpen jumys isteý kerek,— dedi oblys ákimi.
"Adyrna" ulttyq portaly.
