Qasym-Jomart Toqaev jyl saıynǵy Qazaqstan halqyna Joldaýynda Aýǵanstandaǵy jaǵdaıǵa jáne jahandyq shıelenistiń órshýine baılanysty "qorǵanys ónerkásibi kesheni men áskerı doktrınany qaıta júkteý" mindetin qoıdy, dep habarlaıdy "Adyrna" ulttyq portaly.
- Qorǵanys qabiletin nyǵaıtý, qaýip-qaterlerge den qoıýdyń jedeldigin arttyrý - memlekettik mańyzy bar basymdyqtarǵa aınalýy tıis, - dep málimdedi Qasym-Jomart Toqaev.
Memleket basshysy halyqty "syrtqy kúızelisterge jáne oqıǵalardyń eń nashar senarııine daıyn bolýǵa" shaqyrdy. Ol sondaı-aq syrttan keletin táýekelderdi modeldeýdi qajet dep sanaıdy. Prezıdent stress-testter ótkizýdi, senarıılerdi pysyqtaýdy, sonyń negizinde memlekettik apparattyń josparlary men áreketterin ázirlep, túzetýdi usyndy.
Esterińizge sala keteıik, 15 tamyzda Talıban qozǵalysy (Qazaqstanda tyıym salynǵan qozǵalys) Aýǵanstanǵa baqylaý ornatqan bolatyn. Prezıdent Ashraf Ǵanı men aýǵan otbasylary elden qashyp ketti. QR Syrtqy ister mınıstrliginiń málimetinshe, barlyq qazaqstandyqtar elden ketken. Al Qazaqstan Respýblıkasynyń elshisi Álimhan Esengeldıev pen shaǵyn qyzmetkerleri bolsa, Kabýlda qaldy.
"Adyrna" ulttyq portaly
