توتەنشە جاعدايلار ءمينيسترى يۋري يلين جامبىل وبلىسىنداعى جارىلىستان زارداپ شەككەن ءورت سوندىرشىلەر پىكىرىن ءۇزىلدى-كەسىلدى جوققا شىعاردى، دەپ حابارلايدى "ادىرنا" ۇلتتىق پورتالىنىڭ ءتىلشىسى inbusiness.kz-كە سىلتەمە جاساپ.
بۇگىندە ءورت، جارىلىس جانە ادام ءولىمى دەرەكتەرى بويىنشا تەرگەۋ ءجۇرىپ جاتىر. سوندىقتان مەن قاراماعىمداعى ادامداردىڭ مالىمدەمەسىنە قاتىستى تۇسىنىك بەرە المايمىن. الايدا ءبىزدىڭ بولىمشەلەرىمىز كەز-كەلگەن وبەكتىگە كەلەر الدىندا نىسان يەلەرىنەن قاۋىپتىڭ بار-جوعىنا سۇراۋ سالاتىنىن راستايمىن. قويمادا تروتيل ساقتالعان قۇتىلار جانىپ جاتقانى ناقتىلانعان، – دەپ مالىمدەدى مينيستر Instagram-داعى Aibat.kz پابليگىندە.
ونىڭ ايتۋىنشا، تروتيل ساقتالعان قۇتىلار دەتوناتورسىز بولعان، ءارى جارىلۋ قاۋپىن تۋدىرماعان.
نە سەبەپتى جارىلىس بولعانىن تەرگەۋ ورگاندارى انىقتاپ جاتىر. (اسكەريلەر) قاشىپ كەتتى جانە تاعى باسقا دەگەن اقپاراتقا توقتالساق، قازا تاپقانداردىڭ اراسىندا قورعانىس مينيسترلىگى، توتەنشە جاعدايلار مينيسترىلىگىنىڭ قىزمەتكەرلەرى بار. سوندىقتان اركىم وقيعا ورنىندا ءوزىنىڭ مىندەتىن اتقاردى، – دەدى يۋري يلين.
ول كەز كەلگەن جاعدايدا ءورت سوندىرۋشىلەردىڭ باستى مىندەتى اپاتتىڭ سالدارىن جويۋ ەكەنىن اتاپ ءوتتى.
جىگىتتەر ءوز مىندەتىن اتقاردى. ولار وقيعا ورنىنا كەلگەندە قويۋ قارا ءتۇتىن بولدى. سوندىقتان ءبىز وسى ءورتتى ءسوندىرۋ ءۇشىن بارلىق جاۋىنگەرلىك اتقىشتوپتى جينادىق. كەيىن نە بولعانىن تەرگەۋ ورگاندارى انىقتايدى. ارىستا جارىلىس بولعان كەزدە بارلىعى قاۋىپسىز جەرگە جەتكىزىلگەنىن بىلەسىزدەر. العاشقى مالىمەتكە سايكەس، مۇندا جارىلىس قاۋپى بولماعان، – دەدى ۆەدومستۆو باسشىسى.
ايتا كەتەيىك، وسىعان دەيىن ءورت ءسوندىرۋشى اسىل مۇحامبەتجانوۆ جانىنداعى ادامنان جارىلعىش زاتتىڭ بار-جوعىن سۇراعانىن، ال تاعى ءبىر ءورت ءسوندىرۋشى الماز تۇرسىنوۆ جارىلىس كەزىندە اسكەريلەر كومەكتەسپەي كەتىپ قالعانىن جۋرناليستەرگە ايتقان ەدى.
"ادىرنا" ۇلتتىق پورتالى
