Tótenshe jaǵdaılar mınıstri Iýrıı Ilın Jambyl oblysyndaǵy jarylystan zardap shekken órt sóndirshiler pikirin úzildi-kesildi joqqa shyǵardy, dep habarlaıdy "Adyrna" ulttyq portalynyń tilshisi inbusiness.kz-ke silteme jasap.
Búginde órt, jarylys jáne adam ólimi derekteri boıynsha tergeý júrip jatyr. Sondyqtan men qaramaǵymdaǵy adamdardyń málimdemesine qatysty túsinik bere almaımyn. Alaıda bizdiń bólimshelerimiz kez-kelgen obektige keler aldynda nysan ıelerinen qaýiptiń bar-joǵyna suraý salatynyn rastaımyn. Qoımada trotıl saqtalǵan qutylar janyp jatqany naqtylanǵan, – dep málimdedi mınıstr Instagram-daǵy Aibat.kz pablıginde.
Onyń aıtýynsha, trotıl saqtalǵan qutylar detonatorsyz bolǵan, ári jarylý qaýpin týdyrmaǵan.
Ne sebepti jarylys bolǵanyn tergeý organdary anyqtap jatyr. (Áskerıler) qashyp ketti jáne taǵy basqa degen aqparatqa toqtalsaq, qaza tapqandardyń arasynda Qorǵanys mınıstrligi, Tótenshe jaǵdaılar mınıstriliginiń qyzmetkerleri bar. Sondyqtan árkim oqıǵa ornynda óziniń mindetin atqardy, – dedi Iýrıı Ilın.
Ol kez kelgen jaǵdaıda órt sóndirýshilerdiń basty mindeti apattyń saldaryn joıý ekenin atap ótti.
Jigitter óz mindetin atqardy. Olar oqıǵa ornyna kelgende qoıý qara tútin boldy. Sondyqtan biz osy órtti sóndirý úshin barlyq jaýyngerlik atqyshtopty jınadyq. Keıin ne bolǵanyn tergeý organdary anyqtaıdy. Arysta jarylys bolǵan kezde barlyǵy qaýipsiz jerge jetkizilgenin bilesizder. Alǵashqy málimetke sáıkes, munda jarylys qaýpi bolmaǵan, – dedi vedomstvo basshysy.
Aıta keteıik, osyǵan deıin órt sóndirýshi Asyl Muhambetjanov janyndaǵy adamnan jarylǵysh zattyń bar-joǵyn suraǵanyn, al taǵy bir órt sóndirýshi Almaz Tursynov jarylys kezinde áskerıler kómektespeı ketip qalǵanyn jýrnalısterge aıtqan edi.
"Adyrna" ulttyq portaly
