بۇگىنگى كۇنى ەلىمىزدە 20,8 ملن توننا ءشوپ دايىندالعان، بۇل جوسپاردىڭ — 88%-ى. پىشەندەمە دايىنداۋ جوسپاردىڭ 76%-ىن، ال سۇرلەم دايىنداۋ 8%-ىن قۇراپ وتىر دەپ حابارلايدى "ادىرنا" ۇلتتىق پورتالى قر اۋىل شارۋاشىلىعى مينيسترلىگىنىڭ ءباسپاسوز قىزمەتىنە سىلتەمە جاساپ.
ەلىمىزدە قىسقى مال ازىعىن دايىنداۋ ماسەلەسى اۋىل شارۋاشىلىعى ءمينيسترىنىڭ مىندەتىن اتقارۋشى ە.قاراشوكەەۆتىڭ توراعالىعىمەن مينيسترلىك جانىنداعى جەم-شوپپەن قامتاماسىز ەتۋ جونىندەگى رەسپۋبليكالىق جەدەل شتابتىڭ كەزەكتى وتىرىسىندا قارالدى.
ۆەدومستۆو باسشىسى ايماقتارداعى جەم-ءشوپ دايىنداۋ ءىسىنىڭ قازىرگى جاعدايىن "قاناعاتتانارلىق" دەپ باعالادى.
ۆەدومستۆو باسشىسى اتاپ وتكەندەي، ۇكىمەت قارجىنى ۋاقىتىندا ءبولدى، ال اكىمدىكتەردىڭ مىندەتى — شۇعىل تۇردە بۇل قارجىنى شارۋالارعا جەتكىزۋ.
— اقشا بار، مال ازىعىن دايىنداۋ ماۋسىمى ءوتىپ بارادى، جەكە قوسالقى شارۋاشىلىقتار مەن شارۋا قوجالىقتارى بۇل قاراجاتتى اسىعا كۇتىپ وتىر، - دەدى ءمينيستردىڭ مىندەتىن اتقارۋشى.
ماسەلەن، بيىل قۇرعاقشىلىق بولعان ماڭعىستاۋ وبلىسىندا جوسپارلانعان ءشوپتىڭ 48%-ى دايىندالعان.
— بيىل كۇيى تومەن مالمەن قىسقا كىرۋگە ءماجبۇرمىز. ەگەر دايىندىعىمىز ناشار بولسا، كۇردەلى جاعدايعا تاپ بولاتىنىمىز انىق. بارلىق جاۋاپكەرشىلىك سىزدەرگە جۇكتەلەتىنىن ۇمىتپاڭىزدار. ءبىزدىڭ قاتەلىك جاساۋعا قۇقىعىمىز جوق، — دەدى جەدەل شتاب توراعاسى.
"ادىرنا" ۇلتتىق پورتالى.
