الەمدىك قاۋىمداستىقتا تاماشا ءسوز بار. ول «كىم ءوز اسكەرىن اسىراماس، وزگەنىڭ اسكەرىن اسىراۋعا ءماجبۇر بولماق» دەگەن نەگىزدە ايتىلادى. بۇل جالپى تۇتاس العاندا كەز كەلگەن قورعانىس سالاسىنا قاتىستى ماسەلە. سەبەبى جاۋىنگەرلەردى بارلىق قاجەتتىلىكپەن قامتاماسىز ەتۋ اسا ماڭىزدى. سونىڭ ىشىندە تاماقتاندىرۋ ماسەلەسى اسا ماڭىزدى. اش قۇرساق اسكەردىڭ ايبىندى بولۋى، جۇرەكتى بولۋى ەكىتالاي. قۇلقىن ويلاعان جاۋىنگەر، ۇلتىن قايدان ويلاسىن. ونى قازاقستاننىڭ قورعانىس سالاسى ەجەلدەن جاقسى ءتۇسىنىپ، اسكەري ءمازىردى بارىنشا جاقسارتۋعا ماقساتىندا جۇمىس ىستەپ كەلدى. بۇل تۇرعىدان جۇمىستار ءوز جالعاسىن تاۋىپ تا كەلەدى. ءار ۇلتتىڭ وزىندىك ەرەكشەلىكتەرىن دە ەسكەرە وتىرىپ، اسكەري ءمازىردى ازىرلەۋى ءتيىس. بۇل تاجىريبەنى قازاقستان قورعانىس سالاسى دا باسشىلىققا الىپ جاتىر.
مىسالى قازاقستان رەسپۋبليكاسى قورعانىس مينيسترلىگى حالىقارالىق ارميا ويىندارىنا قاتىسۋشىلارعا ديەتالىق قوسپالار مەن ۆيتاميندەر ساتىپ الۋعا 40 ميلليون تەڭگەدەن استام قاراجات ءبولدى. بۇل اسا ماڭىزدى. سەبەبى حالىقارالىق ويىندارعا قاتىسۋشى تۇلعالاردىڭ بارلىعى دەرلىك تەك وزدەرىن عانا ەمەس، وزدەرى انت ەتكەن وتاندارىنىڭ دا ءيميدجىن تانىتۋشى جاندار. سوندىقتان ولاردىڭ بارىنشا ايبىندى، دەنساۋلىقتارى مىعىم بولۋى قاجەت.
قورعانىس مينيسترلىگىنىڭ سپورت كوميتەتى - ورتالىق سپورت كلۋبى مامىر-ماۋسىم ايلارىندا ۆيتاميندەردى ساتىپ الۋ بويىنشا تاپسىرىس ۇيىمداستىرىپ، ناتيجەسىن شىعارىپ تا ۇلگەردى. جەڭىمپازدار - «مير سپورتا» جشس، «يسار ينۆەست» جشس جانە «كۆاترو گارانتو» جشس. ەندى اتالمىش كومپانيالار ساربازدارىمىزدى قاجەتتى دارۋمەندەرمەن قامتاماسىز ەتپەك.
«ARMI-2021» اشىلۋ ءراسىمى ماسكەۋ وبلىسىنداعى «الابينو» ساياباعىندا ءوتتى. 22 تامىز بەن 4 قىركۇيەك ارالىعىندا 40 شتات قاتىساىپ، 11 شتاتتىڭ اۋماعىندا 34 جارىس وتەدى. قازاقستان قارۋلى كۇشتەرى 11 جارىسقا قاتىسادى. قازاقستاندا «ارتيللەريالىق اتىس شەبەرلەرى» جانە «سۇڭقارلار سايىسى» اتتى ەكى سايىس وتەدى. اتالمىش سايىستاردا ءبىزدىڭ جىگىتتەر جاسىنداي جارقىلدايتىنىنا سەنىم مول. بۇل تۇرعىدان ولاردىڭ دۇرىس تاماقتانۋى مەن دارۋمەندەردى الىپ تۇرۋ ماسەلەسى شەشىلگەن.
سايىسقا قاتىسپايتىن ساربازداردىڭ دا ماسەلەسى تولىق قارالىپ، ءوزىنىڭ وڭ شەشىمىن تابۋدا. اتاپ ايتقاندا ەندى قازاق ساربازدارى ءداستۇرلى فورماتتاعى تاعامداردى دا جەيتىن بولادى. قازاقستان قارۋلى كۇشتەرى باس شتابى ۇيىمداستىرۋ-جۇمىلدىرۋ جۇمىسى ءبولىمىنىڭ اعا وفيتسەرى رۋسلان تاپاشەۆ قازاقستاندىق اسكەري قىزمەتشىلەردىڭ ءمازىرىن قالاي ءارتاراپتاندىرۋ كەرەكتىگىن ايتتى.
«قازاق تاماقتاندىرۋ اكادەمياسىمەن بىرلەسە وتىرىپ اسكەريلەردىڭ تاماقتانۋ راتسيونىن جاقسارتۋ بويىنشا ۇلتتىق اسحانا ەرەكشەلىگىن ەسكەرگەن نەگىزدە جۇمىستار جۇرگىزىلۋدە. اسكەريلەردىڭ مازىرىنە قوسىمشا جىلقى، قوي، تۇيە، ۇيرەك، قاز ەتتەرى مەن ءتۇرلى بالىق تۇرلەرىن قوسۋ جاعى جوسپارلانۋدا. سونىمەن قاتار ۇلتتىق سۋسىن تۇرلەرى قىمىز، شۇبات پەن قۇرتتى قوسۋ جاعى دا قاراستىرىلۋدا. سول ارقىلى ءبىز تاماقتانۋدى جاقسارتامىز. تاماقتاندىرۋ قىزمەتتەرىن اۋتسورسينگكە تابىستادىق جانە جەكە كومپانيالارمەن قامتاماسىز ەتىلەدى. سونىمەن قاتار دەسانتتىق-شابۋىلداۋشى اسكەردىڭ تاماعى بولەك، ال ۇشقىشتاردىكى باسقا. بارلىعى دا ولاردىڭ قىزمەتى مەن بورىشتارىن وتەيتىن ەرەكشەلىكتەرگە بايلانىستى» دەيدى مينيسترلىك وكىلدەرى.
وسىلايشا قازاق اسكەرىنىڭ تاماقتانۋ راتسيونى ۇلكەن وزگەرىستەرگە ۇشىراۋدا. تاماقتىڭ قۇنارلىلىعى دا، ساپاسى مەن كولەمى دە ارتىپ، ۇلتتىق ەرەكشەلىكتى دە ەسكەرۋ جاعى تىس قالماۋدا. بۇل اسا ماڭىزدى. ەلىمىزدىڭ ەكونوميكالىق جاعدايى جاقسارعان سايىن ساربازداردى بارلىق جاعىنان قامتاماسىز ەتۋ جاعى دا ارتىپ كەلەدى. كەشەگى وتكەن ەر بابالاردىڭ، قىمىز ءسىمىرىپ، ساداق تارتقان باتىرلاردىڭ ۇرپاقتارى سول تاماقتانۋ ءداستۇرىن قالپىنا كەلتىرىپ، ەلدىكتىڭ قازىعىن نىق قاعۋدا.
"ادىرنا" ۇلتتىق پورتالى
