Ásker máziri: Qymyz iship, qurt jeıdi

2426
Adyrna.kz Telegram

Álemdik qaýymdastyqta tamasha sóz bar. Ol «kim óz áskerin asyramas, ózgeniń áskerin asyraýǵa májbúr bolmaq» degen negizde aıtylady. Bul jalpy tutas alǵanda kez kelgen qorǵanys salasyna qatysty másele. Sebebi jaýyngerlerdi barlyq qajettilikpen qamtamasyz etý asa mańyzdy. Sonyń ishinde tamaqtandyrý máselesi asa mańyzdy. Ash qursaq áskerdiń aıbyndy bolýy, júrekti bolýy ekitalaı. Qulqyn oılaǵan jaýynger, ultyn qaıdan oılasyn. Ony Qazaqstannyń qorǵanys salasy ejelden jaqsy túsinip, áskerı mázirdi barynsha jaqsartýǵa maqsatynda jumys istep keldi. Bul turǵydan jumystar óz jalǵasyn taýyp ta keledi. Ár ulttyń ózindik erekshelikterin de eskere otyryp, áskerı mázirdi ázirleýi tıis. Bul tájirıbeni Qazaqstan qorǵanys salasy da basshylyqqa alyp jatyr.

Mysaly Qazaqstan Respýblıkasy Qorǵanys mınıstrligi halyqaralyq armııa oıyndaryna qatysýshylarǵa dıetalyq qospalar men vıtamınder satyp alýǵa 40 mıllıon teńgeden astam qarajat bóldi. Bul asa mańyzdy. Sebebi halyqaralyq oıyndarǵa qatysýshy tulǵalardyń barlyǵy derlik tek ózderin ǵana emes, ózderi ant etken otandarynyń da ımıdjin tanytýshy jandar. Sondyqtan olardyń barynsha aıbyndy, densaýlyqtary myǵym bolýy qajet.

Qorǵanys mınıstrliginiń sport komıteti - Ortalyq sport klýby mamyr-maýsym aılarynda vıtamınderdi satyp alý boıynsha tapsyrys uıymdastyryp, nátıjesin shyǵaryp ta úlgerdi. Jeńimpazdar - «Mır Sporta» JShS, «Isar Invest» JShS jáne «Kvatro Garanto» JShS. Endi atalmysh kompanııalar sarbazdarymyzdy qajetti dárýmendermen qamtamasyz etpek.

«ARMI-2021» ashylý rásimi Máskeý oblysyndaǵy «Alabıno» saıabaǵynda ótti. 22 tamyz ben 4 qyrkúıek aralyǵynda 40 shtat qatysayp, 11 shtattyń aýmaǵynda 34 jarys ótedi. Qazaqstan Qarýly Kúshteri 11 jarysqa qatysady. Qazaqstanda «artıllerııalyq atys sheberleri» jáne «suńqarlar saıysy» atty eki saıys ótedi. Atalmysh saıystarda bizdiń jigitter jasyndaı jarqyldaıtynyna senim mol. Bul turǵydan olardyń durys tamaqtanýy men dárýmenderdi alyp turý máselesi sheshilgen.

Saıysqa qatyspaıtyn sarbazdardyń da máselesi tolyq qaralyp, óziniń oń sheshimin tabýda. Atap aıtqanda endi qazaq sarbazdary dástúrli formattaǵy taǵamdardy da jeıtin bolady. Qazaqstan Qarýly Kúshteri Bas shtaby Uıymdastyrý-jumyldyrý jumysy bóliminiń aǵa ofıeri Rýslan Tapashev qazaqstandyq áskerı qyzmetshilerdiń mázirin qalaı ártaraptandyrý kerektigin aıtty.

«Qazaq tamaqtandyrý akademııasymen birlese otyryp áskerılerdiń tamaqtaný raıonyn jaqsartý boıynsha ulttyq ashana ereksheligin eskergen negizde jumystar júrgizilýde. Áskerılerdiń mázirine qosymsha jylqy, qoı, túıe, úırek, qaz etteri men túrli balyq túrlerin qosý jaǵy josparlanýda. Sonymen qatar ulttyq sýsyn túrleri qymyz, shubat pen qurtty qosý jaǵy da qarastyrylýda. Sol arqyly biz tamaqtanýdy jaqsartamyz. Tamaqtandyrý qyzmetterin aýtsorsıngke tabystadyq jáne jeke kompanııalarmen qamtamasyz etiledi. Sonymen qatar desanttyq-shabýyldaýshy áskerdiń tamaǵy bólek, al ushqyshtardyky basqa. Barlyǵy da olardyń qyzmeti men boryshtaryn óteıtin erekshelikterge baılanysty» deıdi mınıstrlik ókilderi.

Osylaısha qazaq áskeriniń tamaqtaný raıony úlken ózgeristerge ushyraýda. Tamaqtyń qunarlylyǵy da, sapasy men kólemi de artyp, ulttyq erekshelikti de eskerý jaǵy tys qalmaýda. Bul asa mańyzdy. Elimizdiń ekonomıkalyq jaǵdaıy jaqsarǵan saıyn sarbazdardy barlyq jaǵynan qamtamasyz etý jaǵy da artyp keledi. Keshegi ótken er babalardyń, qymyz simirip, sadaq tartqan batyrlardyń urpaqtary sol tamaqtaný dástúrin qalpyna keltirip, eldiktiń qazyǵyn nyq qaǵýda.

"Adyrna" ulttyq portaly

 

Pikirler