«ادىرنا» ءتىلشىسى قاراعاندى وبلىسى تجد-نىڭ ءوڭىردى دامىتۋ ءۇشىن العا قويعان ماقسات-جوسپارلارىنان حالىقتى حاباردار ەتۋ ماقساتىندا دەپارتامەنت باستىعىنىڭ ورىنباسارى اقىلبەك احمەتجانوۆپەن اڭگىمەلەستى.
- قاراعاندى تجد-عا تيەسىلى تەحنيكالاردىڭ سانى قانشا؟
- قۇتقارۋ بولىمشەلەرىن ارنايى تەحنيكامەن جانە جابدىقتارمەن ماتەريالدىق-تەحنيكالىق جاراقتاندىرۋ جەدەل ارەكەت ەتۋدى ارتتىرادى جانە تيىسىنشە حالىقتى قورعاۋ دەڭگەيىن جوعارىلاتادى. قۇتقارۋ قىزمەتتەرى وبلىس حالقىن بارلىق ىقتيمال توتەنشە جاعدايلاردان سەنىمدى قورعاۋدى قامتاماسىز ەتۋ ءۇشىن قاراعاندى وبلىسى تجد قاراماعىندا 487 تەحنيكا بار، ونىڭ ىشىندە نەگىزگى، ارنايى ماقساتتاعى، ينجەنەرلىك جانە قوسالقى اۆتوكولىكتەر. سوڭعى 5 جىلدا اۆتوتەحنيكا پوستى 100 بىرلىكتەن استام تەحنيكامەن تولىقتى. 2021-2023 جىلدارعا توتەنشە جاعدايلاردى ازايتۋ ماقساتىندا جاڭا جابدىقتار مەن تەحنيكالار الۋ جوسپارلانعان.
- ال كۇندەلىكتى نەشە قىزمەتكەر جاۋىنگەرلىك كەزەكشىلىگىن اتقارادى؟
- قاراعاندى وبلىسىنىڭ توتەنشە جاعدايلار دەپارتامەنتى تجم ەڭ ءىرى اۋماقتىق بولىمشەسى رەتىندە وبلىس اۋماعىنداعى حالىقتىڭ قاۋىپسىزدىگىن تولىق كولەمدە اتقارىپ كەلەدى.
بۇگىندە قاراعاندى وبلىسىندا ءورت ءسوندىرۋ جانە اۆاريالىق-قۇتقارۋ جۇمىستارى قىزمەتىنىڭ 36 ءورت ءسوندىرۋ ءبولىمى، جەدەل-قۇتقارۋ جاساعىنىڭ 7 قۇتقارۋ بولىمشەسى، اپاتتار مەديتسيناسى ورتالىعىنىڭ 7 تراسسالىق-مەديتسينالىق قۇتقارۋ پۋنكتى، «ءورت ءسوندىرۋشى» اق 19 بولىمشەسى تاۋلىك بويى جاۋىنگەرلىك دايىندىقتا تۇر. دەپارتامەنتتە شتات بويىنشا 2326 قىزمەتكەر بار.
قاراعاندى وبلىسى بويىنشا كۇندەلىكتى 300-دەن استام جاۋىنگەر كەزەكشىلىك ەتەدى.
- بيىل وبلىستا ءورت جاعدايىنىڭ تىركەلۋى ازايدى ما؟
- جىل باسىنان بەرى قاراعاندى وبلىسىنىڭ اۋماعىندا 637 ءورت تىركەلدى، وتكەن جىلدىڭ سايكەس كەزەڭىمەن سالىستىرعاندا ورتتەردىڭ 23,4% - عا تومەندەگەنى بايقالادى (2020 جىلى-832 ءورت).
ءورت كەزىندە 33 ادام قازا تاپتى، وتكەن جىلمەن سالىستىرعاندا 83%-عا كوبەيدى (2020 ج. - 18 ادام). قازا بولعانداردىڭ اراسىندا 2 بالا بار (2020ج. - 0). 26 ادام جاراقات الدى، وتكەن جىلمەن سالىستىرعاندا 2,3 ەسە ءوستى (2020 ج. - 11 ادام), ونىڭ ىشىندە بالالاردىڭ جاراقاتتانۋى بولعان جوق.
2021 جىلدىڭ ءورت قاۋىپتى كەزەڭى باسىنان قاراعاندى وبلىسىنىڭ اۋماعىندا جالپى اۋدانى 75,745 گا 27 ورمان ءورتى (2020 جىلى جالپى اۋدانى 75,6047 گا 18 فاكت), جالپى اۋدانى 61534,5 گا 303 دالا ورتتەرى مەن جانۋلارى تىركەلدى (2020 جىلى جالپى اۋدانى 16697,27 گا 231 فاكت).
- پاندەميا قاراعاندى تجد قۇتقارۋشىلارىنىڭ جۇمىسىنا قالاي اسەر ەتتى؟
- قاراعاندى وبلىسىنىڭ تجد قىزمەتكەرلەرى پاندەميانىڭ باسىنان باستاپ كوروناۆيرۋسپەن كۇرەستە الدىڭعى قاتاردا بولدى، تاۋلىك بويى قىزمەت ەتتى. كارانتين جاعدايىنداعى باستى مىندەت تج قىزمەتى بولىمشەلەرىنىڭ جاۋىنگەرلىك دايىندىعىن ساقتاۋ بولىپ تابىلادى، ونىڭ نەگىزگى تالاپتارى-ءتارتىپ، توتەنشە جاعداي كەزىندە سانيتارلىق نورمالاردى قاتاڭ ساقتاۋ جانە قازاقستان حالقى الدىنداعى الەۋمەتتىك جاۋاپكەرشىلىكتى سەزىنۋ.
كارانتين كەزىندە قاراعاندىلىق قۇتقارۋشىلار دا كوروناۆيرۋستىق ينفەكتسيا قاۋپىن ازايتۋعا ۇلەسىن قوستى. ءورت ءسوندىرۋ بولىمشەلەرىنىڭ تەحنيكالىق مۇمكىندىكتەرىن پايدالانا وتىرىپ، قاراعاندى قالاسىنىڭ كوشەلەرى بۇركۋ ادىسىمەن دەزينفەكتسيالىق ەرىتىندىلەرمەن وڭدەلدى.
سونىمەن بىرگە، دەپارتامەنت بولىمشەلەرىنىڭ جەكە قۇرامى اراسىندا سانيتارلىق باقىلاۋ كۇشەيتىلىپ، ينفەكتسيانىڭ تارالۋىن الدىن الۋ بويىنشا جانە كارانتين شارالارىنىڭ ساقتالۋى بويىنشا ءىس-شارالار وتكىزىلىپ جاتىر. ايتا كەتۋ كەرەك، جەكە قۇرام جەكە قورعانۋ جانە دەزينفەكتسيا قۇرالدارىمەن قامتاماسىز ەتىلدى.
- قۇتقارۋشى بولۋ ءۇشىن قانداي قاسيەتتەردى بويعا ءسىڭىرۋ قاجەت؟ بۇل ماماندىققا سۇرانىس قانشالىقتى كوپ؟
- قاۋىپتى جاعدايلار تۋىنداعان ساتتەردە ەرلىك كورسەتىپ، قاتەردەن ادام جانىن اراشالاپ قانا قويماي، ودان ءارى قاۋىپسىزدىكتى قامتاماسىز ەتەتىن قۇتقارۋشى ماماندارى قاشان دا قۇرمەتكە لايىق. وسى ماماندىق يەگەرلەرى وزگەلەردى قۇتقارۋ جولىندا ءوز باسىن قاتەرگە تىگىپ، قۇربان بولۋعا دايىن جاندار. سوندىقتان ەڭ مىقتى، قايسار دا باتىل جاندار عانا ومىرلىك قىزمەتى رەتىندە قۇتقارۋشى بولۋدى تاڭدايدى.
ناعىز ەر ازاماتتارعا عانا ءتان قۇتقارۋشى قىزمەتى جۇرەكتىلىك پەن باتىلدىقتى تالاپ ەتەدى. ولاردىڭ بويىندا جەدەلدىلىك، تارتىپتىلىك، تەمىردەي قاجىرلىلىق بولۋى كەرەك.
قۇتقارۋشى قىزمەتى پسيحيولوگيالىق تۇرعىدان وتە قيىن جۇمىس. سەبەبى قۇتقارۋ كەزىندە ولار ءار ءتۇرلى ادامداردىڭ قايعىلى جاعدايلارىنا كۋا بولادى. مۇنداي كۇيدى كۇن سايىن باسىنان كەشەتىن قۇتقارۋشىلارعا وڭاي ەمەس. الايدا قۇتقارۋشىلاردىڭ سوزىنشە، ادامدى ولىمنەن ساقتاپ قالعان كەز قىزمەتىمىزدىڭ ەڭ جاعىمدى ءساتى دەيدى.
جاستار اراسىندا قۇتقارۋشى ماماندىعىنا دەگەن قىزىعۋشىلىق ارتۋدا. بۇگىندە 347 ۇمىتكەر جۇمىسقا تۇرۋعا نيەت بىلدىرگەن.
- سۇقباتىڭىزعا راقمەت!
"ادىرنا" ۇلتتىق پورتالى
