جامبىل وبلىسى بايزاق اۋدانىنداعى توتەنشە وقيعا كەزىندە قاۋىپسىز جەرگە كوشىرىلگەن تۇرعىنداردىڭ كەيبىرى دەر كەزىندە كورسەتىلگەن كومەك ءۇشىن العىس ايتىپ جاتىر ، دەپ حابارلايدى «ادىرنا ءتىلشىسى قازاقپارات-قا سىلتەمە جاساپ.
«وسى جۇرگەن بالالاردىڭ، قىزداردىڭ بارىنە راحمەتىمدى ايتامىن. ەلدى وسى جەرگە اكەپ، كوپشىلىكتى جيناپ، امان-ەسەن شىعارىپ سالىپ جاتقاندارى ءۇشىن كوپ راحمەت. ەڭبەكتەرىڭنىڭ جەمىسىن كورىڭدەر. قيىندىقتا بارلىق كومەك كورسەتتى، اۋقاتى دايىن. كەشكى ساعات ونداردا الىپ كەلدى. تاڭعا دەيىن جەدەل جاردەم قىزمەتى دە قان قىسىمىمىزدى تەكسەرىپ جاتىر. وسىلاي كومەك بەرگەندەرىنە وتە ريزامىن»، - دەيدى بايزاق اۋىلىنىڭ تۇرعىنى زۋحرا بەرديەۆا.
تاعى ءبىر تۇرعىن بوتامويناق اۋىلدىق وكرۋگىندە ەۆاكۋاتسيالانعان حالىقتىڭ ءۇي-مۇلكىن كۇزەتكەن پاترۋل قىزمەتىنە العىس ءبىلدىردى.
«مەن بوتامويناق اۋىلدىق وكرۋگىنىڭ تۇرعىنىمىن. تۇندەگى جاعدايعا باليانىستى قۇقىق قورعاۋ سالاسى، پاترۋلدىك قىزمەت وكىلدەرىنىڭ ارقاسىندا اۋىلدىڭ حالقى ەۆاكۋاتسيالانىپ، سىرتقا شىقتى. اۋىلدان ەشقانداي شىعىن بولعان جوق. وندايعا جول بەرىلگەن جوق. مىنا جىگىتتەر تۇنىمەن ءپاترۋلى بار، ىشكى ىستەر قىزمەتكەرلەرى بار، اۋىل-اۋىلدى ارالاپ، ءبارىن سابىرعا شاقىرىپ، مىندەتتەرىن اتقارىپ جاتتى. اۋىل قىلمىستان امان-ەسەن. مورادەرلىك سياقتى جايتتار بولعان جوق»، - دەيدى وكرۋگ تۇرعىنى.
قر توتەنشە جاعدايلار مينيسترلىگىنىڭ ءباسپاسوز قىزمەتى تاراتقان رەسمي مالىمەت بويىنشا، وقيعا وشاعى سانالاتىن كورولەۆكا كەنتىندەگى اسكەري قويماعا ەڭ جاقىن ورنالاسقان 3 ەلدى مەكەندە 1 مىڭنان استام ادام تۇرادى. ولاردىڭ 710-ى وبلىس ورتالىعىنا ەۆاكۋاتسيالانعان. جامبىل وبلىسىنىڭ اكىمى بەردىبەك ساپارباەۆ ەۆاكۋاتسيالانعان اۋىل تۇرعىندارى بۇگىن ۇيىنە قايتارىلاتىنىن ايتقان ەدى.
ايتا كەتەيىك، 26 تامىز كۇنى ساعات 19:00-دە جامبىل وبلىسىنىڭ بايزاق اۋدانىندا ورنالاسقان اسكەري ءبولىم قويمالارىنىڭ بىرىنەن ءورت شىعىپ، جارىلىس بولدى.
«ادىرنا» ۇلتتىق پورتالى
