الماتى قالاسى الاتاۋ اۋدانى اكىمدىگىنىڭ كۇزەتشىسى اۋدان باسشىسىنان سۇحبات الماق بولعان «حابار 24» ارناسىنىڭ ءتىلشىسى اقبوپە تاڭىربەرگەندى عيماراتتان كۇشتەپ شىعارعان. بۇل تۋرالى جۋرناليست الەۋمەتتىك جەلىدەگى پاراقشاسىندا جازدى، دەپ حابارلايدى «ادىرنا» ءتىلشىسى.
«سەن - اكىمدىك پەن حالىق اراسىنداعى كوپىرسىڭ»،-دەدىڭىزدەر. مەن جەلپىلدەپ جەتىپ باردىم. اكىمدىك بولسا سىزدەردىڭ كوپىرلەرىڭىزدى دالاعا لاقتىرىپ جىبەردى. ءبىتتى. الماتى قالاسى الاتاۋ اۋدانىنداعى اكىمدىكتەن ماڭگى ەستەلىك»،– دەپ جازدى ول.
بولعان وقيعاعا اقپارات جانە قوعامدىق دامۋ ءمينيسترى دە بەي-جاي قارامادى. ايدا بالاەۆا كىنالى تۇلعالاردى جاۋاپقا تارتۋ كەرەكتىگىن اتاپ ءوتتى.
«وزدەرىڭىزگە ءمالىم، الماتى قالاسى، الاتاۋ اۋدانى اكىمدىگى قىزمەتكەرىنىڭ جۋرناليست اقبوپە تاڭىربەرگەنگە كۇش قولدانعان تەرىس ارەكەتى ينتەرنەت جەلىسىندە قىزۋ تالقىلانىپ جاتىر. اۋداندىق اكىمدىكتىڭ جاۋاپتى تۇلعالارىنىڭ بۇعان قاتىستى ەش شارا قولدانباۋى ماسەلەنى ءتىپتى دە ۋشىقتىرىپ وتىر. بۇل ارينە وتە وكىنىشتى جانە ءبىزدىڭ بۇگىنگى “ەستيتىن مەملەكەت”، “اشىق اكىمدىك” قاعيدالارىنا قايشى كەلەتىن جاعداي. جۋرناليستەردىڭ قۇقىعىن بۇزۋعا، ولاردىڭ رەسمي جۇمىسىنا كەدەرگى كەلتىرىپ، كۇش كورسەتۋگە ەشقاشان جول بەرىلمەۋى كەرەك. بۇل جاعدايعا قاتىستى، الماتى قالاسى اكىمدىگىنىڭ باسشىلىعى قىزمەتتىك تەكسەرۋ جۇرگىزىپ، ءتيىستى شارالار قابىلداۋى قاجەت دەپ سانايمىن. كىنالى تۇلعالار جاۋاپقا تارتىلۋى ءتيىس. الداعى ۋاقىتتا قاي جەردە بولماسىن، باق وكىلدەرىنە قاتىستى بۇنداي كەلەڭسىز جاعدايلارعا جول بەرىلمەۋى قاجەت»،– دەدى مينيستر.
«ادىرنا» ۇلتتىق پورتالى
