Almaty qalasy Alataý aýdany ákimdiginiń kúzetshisi aýdan basshysynan suhbat almaq bolǵan «Habar 24» arnasynyń tilshisi Aqbópe Táńirbergendi ǵımarattan kúshtep shyǵarǵan. Bul týraly jýrnalıst áleýmettik jelidegi paraqshasynda jazdy, dep habarlaıdy «Adyrna» tilshisi.
«Sen - Ákimdik pen Halyq arasyndaǵy kópirsiń»,-dedińizder. Men jelpildep jetip bardym. Ákimdik bolsa sizderdiń kópirlerińizdi dalaǵa laqtyryp jiberdi. Bitti. Almaty qalasy Alataý aýdanyndaǵy ákimdikten máńgi estelik»,– dep jazdy ol.
Bolǵan oqıǵaǵa Aqparat jáne qoǵamdyq damý mınıstri de beı-jaı qaramady. Aıda Balaeva kináli tulǵalardy jaýapqa tartý kerektigin atap ótti.
«Ózderińizge málim, Almaty qalasy, Alataý aýdany ákimdigi qyzmetkeriniń jýrnalıst Aqbópe Táńirbergenge kúsh qoldanǵan teris áreketi ınternet jelisinde qyzý talqylanyp jatyr. Aýdandyq ákimdiktiń jaýapty tulǵalarynyń buǵan qatysty esh shara qoldanbaýy máseleni tipti de ýshyqtyryp otyr. Bul árıne óte ókinishti jáne bizdiń búgingi “estıtin memleket”, “ashyq ákimdik” qaǵıdalaryna qaıshy keletin jaǵdaı. Jýrnalısterdiń quqyǵyn buzýǵa, olardyń resmı jumysyna kedergi keltirip, kúsh kórsetýge eshqashan jol berilmeýi kerek. Bul jaǵdaıǵa qatysty, Almaty qalasy ákimdiginiń basshylyǵy qyzmettik tekserý júrgizip, tıisti sharalar qabyldaýy qajet dep sanaımyn. Kináli tulǵalar jaýapqa tartylýy tıis. Aldaǵy ýaqytta qaı jerde bolmasyn, BAQ ókilderine qatysty bundaı keleńsiz jaǵdaılarǵa jol berilmeýi qajet»,– dedi mınıstr.
«Adyrna» ulttyq portaly
