تاليبانداردىڭ قاتارىنا يسلام ەميراتىنىڭ مودجاحەدتەرى دە قوسىلدى. كەشە تاليباندار احماد ماسۋدقا ۋلتيماتۋم قويىپ، تەز ارادا جاۋاپ بەرۋىن تالاپ ەتكەن ەدى. بىراق قازىر تاليباندار مەن يسلام ەميراتىنىڭ مودجاحەدتەرىنىڭ بىرىككەن كۇشىنىڭ تالابىنا احماد ماسۋدتىڭ جاساقتارى كەلىسپەدى. تالىپتەر ۋاقىت بەردى. ەندى پاندجشەردەگى جاعداي قيىنداعان سياقتى.
پاندجشەر جازىعىندا قازىر اۋعانستاننىڭ ۆيتسە-پرەزيدەنتى امرۋللا سالەح پەن قورعانىس سالاسىنىڭ ەكس-ءمينيسترى بيسميللا موحامماد تا ءجۇر. احماد ماسۋدتى قولداۋشىلاردىڭ دا قاتارى كوبەيىپ جاتىر. قازىر ماسۋدتىڭ جاساعىنا پاندجشەردەگى ارنايى جاساق پولكوۆنيگى مۋنيب ءامىر، اۋعان ۇلتتىق ارمياسىنىڭ كومانديرى حاميد سايفي، قولباسشى ءارى گەنەرال حاسيب پاندجشيري دە قوسىلدى. ولارمەن بىرگە ەرىپ كەلگەن ساربازدار دا ماسۋدتىڭ جاساعىنا كەلىپ بىرىكتى.
وسىدان 3 ساعات بۇرىن تاجىكستاننىڭ شەكارا ماڭىنا قونىستانعان جەرگىلىكتى تۇرعىنداردان قۇرالعان انتيتالىپتىك كۇشتەردەن ماسۋدتىڭ جاساعىنا قوسىلامىز دەگەن حابارى جەتتى. ءتىپتى ەمومالي راحموننىڭ ءوزى ەرىكتى ازاماتتاردىڭ بارىنە سوعىسقا قاتىسۋعا رۇقسات بەرىپتى. كەيبىر اقپارات كوزدەرى بۇل اقپاراتتى راستاماي وتىر.
ماسۋدتىڭ قاتارىنىڭ كوبەيگەنىمەن، قارۋ-جاراقتىڭ جەتكىلىكسىزدىگى قولبايلاۋ بولىپ جاتىر. ماسۋد اسكەرلەرىنە جانقيارلىقپەن شايقاسۋىنا تۋرا كەلىپ تۇر. قازىرگە سىرتتان ەشقانداي دا كومەك بولماي جاتىر. ال تالىپتەر قازىر اۋعانستاننىڭ بارلىق شەكارا تۇسىن باقىلاۋعا الىپ ۇلگەرگەن. تالىپتەرمەن قاقتىعىستا ماسۋد جاساقتارىنا قارۋ-جاراقپەن قاتار اس-سۋ مەن تاماقتىڭ دا جەتىسپەۋشىلىگى تۋىنداۋدا. سوندىقتان دا تالىپتەردىڭ تاراپىنان تۋىنداعىن قاۋىپتىڭ باسىمدىعى جوعارى.
پاندجشەردىڭ جەرگىلىكتى تۇرعىندارىنىڭ باسىم بولىگىن ەتنيكالىق تاجىكتەر قۇرايدى. ال، تاجىكتەردىڭ دە ەرىكتى جاساقتارى ماسۋدتىڭ جاعىنا توپتاسىپ جاتىر. 2001 جىلى احماد شاح ماسۋد تالىپتەرمەن قاقتىعىستا سولتۇستىك وڭىرگە ىعىسىپ بارىپ، ءوزىنىڭ ارمياسىن جاساقتاعان بولاتىن. بىراق اۋعان قولباسشىسىنان كۇشى باسىم تالىپتەرمەن قاقتىعىستا ماحماد شاح ماسۋد مايداندا قازا بولادى. سودان كۇشىنە مىنگەن تالىپتەردى سولتۇستىك اليانستىڭ كۇشتەرى تالقانىن شىعارىپ، رەسمي اۋعان بيلىگىن ساقتاپ قالعان ەدى. ارادا 32 جىل وتكەننەن سوڭ ونىڭ ۇلى احماد ماسۋد ءدال وسى پاندجشەرگە بۇكىل ۇلتشىل كۇشتەردىڭ ءبارىنىڭ باسىن قوسىپ، ۇلكەن كۇش جيناپ جاتىر.
بۇل سوعىستا ماسۋدتى تىزە بۇكتىرۋ تاليبان راديكالدى قوزعالىسىنا دا وڭايعا تۇسپەيىن سياقتى. سەبەبى، ماسۋدتىڭ اينالاسىنا دا جان جاقتاعى بۇرىنعى اسكەرباسىلار مەن ەرىكتى ساربازدار توپتاسىپ ۇلگەردى.
بەكبولات قارجان،
«ادىرنا» ۇلتتىق پورتالى
