كابۋلدا نە بولىپ جاتقانىن جانە تۇرعىنداردىڭ ول جەردەن قالاي كەتكىسى كەلەتىنىن جاقسى ءتۇسىنۋ ءۇشىن بارلىق باق-تا تارالىپ كەتكەن بەينەجازبانى كورۋ جەتكىلىكتى. بۇل تۋرالى اۋعانستان يسلام رەسپۋبليكاسىنىڭ قازاقستان رەسپۋبليكاسىنداعى ەلشىلىگى ىستەرىندە ۋاقىتشا سەنىم جۇكتەلگەن وكىلى ازيز ومار Tengrinews.kz تىلشىسىنە بەرگەن سۇحباتىندا ايتتى.
«ادامدار سوعىستان قاشىپ جاتىر. حالىق قازىر اۋعانستاننان باسقا كەز كەلگەن جەردە بولۋعا دايىن. ەفيوپياعا ۇشاق بولسا، ولار سول ەلگە دە بارۋعا ءازىر»،– دەدى ديپلومات.
اڭگىمە بارىسىندا ازيز ومار اۋعانستاننان قازاقستانعا كەلگىسى كەلەتىندەردىڭ كوپ ەكەنىن جەتكىزدى.
«بۇل ەلدە سوڭعى جيىرما جىل ىشىندە جانە سوڭعى ەكى ايدا كۇن سايىن 200 ادام قايتىس بولاتىنىن ءتۇسىنۋ كەرەك. بۇل شىندىق. ەگەر قازاقستان اۋعانستانعا چارتەرلىك رەيستەر جاساي الاتىن بولسا، وندا كوپتەگەن ءوتىنىش كەلىپ تۇسەر ەدى. ازىرگە كابۋلدا سوعىس بولىپ جاتقان جوق، الايدا كوپشىلىك ەرتەڭى ءۇشىن الاڭداۋدا. قازىر ول جاقتا جارىق تا، سۋ دا جوق. مەملەكەت الداعى كۇندى بولجاي المايتىن جاعدايدا وتىر.
وزدەرىڭىز بىلەتىندەي، قازىرگى ۋاقىتتا ءبىز وتپەلى كەزەڭدە تۇرمىز. پرەزيدەنت بيلىك وزگەرمەس بۇرىن ەلدەن كەتتى. بۇگىندە كابۋلداعى ساياسي بيلىكتى ءۇش ادام باقىلايدى: اۋعانستاننىڭ بەيبىتشىلىك پروتسەسىنىڭ باسشىسى دوكتور ابدۋللا ابدۋللا، اۋعانستاننىڭ ەكس-پرەزيدەنتى حاميد كارزاي جانە يسلام پارتياسىنىڭ جەتەكشىسى گۇلبەددين حەكماتيار.
كەشە ولار پاكىستاننىڭ سىرتقى ىستەر مينيسترىمەن كەزدەستى. بۇگىن دوحاعا ۇشىپ كەتتى. بالكىم ۋاقىتشا ۇكىمەت قۇرۋدى سۇرايدى. بۇگىن وتە ماڭىزدى كۇن، كەشكە دەيىن ناتيجە بولادى دەپ ۇمىتتەنەمىز»،– دەپ سەنىم ءبىلدىردى ول.
«ادىرنا» ۇلتتىق پورتالى
