Kabýlda ne bolyp jatqanyn jáne turǵyndardyń ol jerden qalaı ketkisi keletinin jaqsy túsiný úshin barlyq BAQ-ta taralyp ketken beınejazbany kórý jetkilikti. Bul týraly Aýǵanstan Islam Respýblıkasynyń Qazaqstan Respýblıkasyndaǵy Elshiligi isterinde Ýaqytsha senim júktelgen ókili Azız Omar Tengrinews.kz tilshisine bergen suhbatynda aıtty.
«Adamdar soǵystan qashyp jatyr. Halyq qazir Aýǵanstannan basqa kez kelgen jerde bolýǵa daıyn. Efıopııaǵa ushaq bolsa, olar sol elge de barýǵa ázir»,– dedi dıplomat.
Áńgime barysynda Azız Omar Aýǵanstannan Qazaqstanǵa kelgisi keletinderdiń kóp ekenin jetkizdi.
«Bul elde sońǵy jıyrma jyl ishinde jáne sońǵy eki aıda kún saıyn 200 adam qaıtys bolatynyn túsiný kerek. Bul shyndyq. Eger Qazaqstan Aýǵanstanǵa charterlik reıster jasaı alatyn bolsa, onda kóptegen ótinish kelip túser edi. Ázirge Kabýlda soǵys bolyp jatqan joq, alaıda kópshilik erteńi úshin alańdaýda. Qazir ol jaqta jaryq ta, sý da joq. Memleket aldaǵy kúndi boljaı almaıtyn jaǵdaıda otyr.
Ózderińiz biletindeı, qazirgi ýaqytta biz ótpeli kezeńde turmyz. Prezıdent bılik ózgermes buryn elden ketti. Búginde Kabýldaǵy saıası bılikti úsh adam baqylaıdy: Aýǵanstannyń beıbitshilik proesiniń basshysy doktor Abdýlla Abdýlla, Aýǵanstannyń eks-prezıdenti Hamıd Karzaı jáne Islam partııasynyń jetekshisi Gúlbeddın Hekmatıar.
Keshe olar Pákistannyń Syrtqy ister mınıstrimen kezdesti. Búgin Dohaǵa ushyp ketti. Bálkim ýaqytsha úkimet qurýdy suraıdy. Búgin óte mańyzdy kún, keshke deıin nátıje bolady dep úmittenemiz»,– dep senim bildirdi ol.
«Adyrna» ulttyq portaly
