يسپانيادا «بارسەلونانىڭ» بۇرىنعى شابۋىلشىسى ليونەل مەسسيدىڭ قوشتاسۋ ءباسپاسوز ءماسليحاتىندا كوز جاسىن سۇرتكەن قاعاز ورامالى Mercado Libre اۋكتسيونىنا قويىلعاندىعى انىقتالدى. ورامالدىڭ باستاپقى قۇنى — 1 ميلليون دوللار دەپ حابارلايدى "ادىرنا" ۇلتتىق پورتالى "ريدۋس.رۋ" سايتىنا سىلتەمە جاساپ.
مەسسي ءومىرىنىڭ كوپ بولىگىن «بارسەلوناعا» ارنادى. ارگەنتينالىق فۋتبولشى يسپانيا چەمپيوناتىنىڭ، چەمپيوندار ليگاسىنىڭ بىرنەشە دۇركىن جەڭىمپازى اتاندى، التى رەت «الەمنىڭ ۇزدىك فۋتبولشىسى» اتاعىن جەڭىپ الدى. ونى بۇل كلۋبتىڭ ناعىز اڭىزى دەپ ساناۋعا بولادى.
بيىل تامىزدا ارگەنتينالىق شابۋىلشى ليونەل مەسسي رەسمي تۇردە فرانتسيانىڭ "پاري سەن-جەرمەن" فۋتبول كلۋبىنا اۋىستى. وسىدان كەيىن ليونەل مەسسي ءوزىنىڭ رەسمي سايتىندا تەگى جازىلعان فۋتبولكالاردى ساتىلىمعا شىعاردى. ءبىر ساعاتتا 250 مىڭ فۋتبولكا ساتىلعان.
قازىر الەۋمەتتىك جەلىلەردە فۋتبولشىنىڭ بەت ورامالىنىڭ قىمبات باعاعا ساتىلۋىنا بايلانىستى ءار ءتۇرلى پىكىرلەر ايتىلۋدا. بىرقاتار جانكۇيەرلەر «بوتەن جاراتىلىس يەسىنىڭ بيوماتەريالى» شىنىمەن قىمبات تۇرادى» دەپ باعالاۋدا.
"ادىرنا" ۇلتتىق پورتالى.
