مال ازىعىنىڭ جەتىسپەۋىنەن قىزىلوردالىق فەرمەردىڭ قويى قىرىلدى، دەپ حابارلايدى ەك.
رۋستەم قۇدايبەرگەنوۆ قوي شارۋاشىلىعىمەن 2016 جىلدان بەرى اينالىسىپ كەلەدى. كاسىبىن باستاۋ ءۇشىن ول مەملەكەتتەن تومەندەتىلگەن پايىزبەن نەسيە العان. قۋاڭشىلىق كەزىندە شارۋانىڭ ءبىر وتار، ياعني 650 قويىنىڭ 217-ءى اشتان قىرىلعان. سەبەبى — مال ازىعى جوق، ءشوپ كۇنگە كۇيىپ كەتكەن، جەۋگە جارامسىز.
قازىر ول قالعان مالىن امان ساقتاپ قالۋ ءۇشىن جەزقازعان وبلىسىنداعى تانىسىنا ءوتىنىش ايتىپ، سول جاقتاعى جايىلىمعا باردى.
رۇستەم قۇدايبەرگەنوۆتىڭ سوزىنشە، مال قىرىلعان كەزدە وعان مەملەكەتتەن ەشقانداي كومەك بولماعان.
بۇگىندە كاسىپكەردىڭ نەسيەسى تولىق تولەنىپ بىتپەگەن، ءالى 100 ميلليون تەڭگەدەي بانككە قارىزى بار.
قىزىلوردا وبلىسى، ارال اۋدانىنداعى اۋىلداردا 500-دەن اسا مال ولگەن. وزەكتى ماسەلە ءالى كۇرمەۋىن تاپقان جوق. ماماندار مالدىڭ جاپپاي قىرىلۋىنىڭ سەبەبىن قۋاڭشىلىقپەن بايلانىستىردى. ءمۇيىزدى ءىرى قارا، جىلقى، قويعا ازىق جەتىسپەي وتىر. ارىق مال اۋرۋعا شالدىعىپ، اشتان قاتۋدا. كۇردەلى ماسەلەگە الاڭداعان قازقستاندىقتار توتەنشە جاعداي جاريالانعان ارال اۋدانىنا مال ازىعىن ءجيى جىبەرىپ جاتىر.
سونداي-اق، اۋىل شارۋاشىلىعى مينيسترلىگى جەدەل ءىس-شارالار جۇرگىزىپ، جاعدايدىڭ تۇراقتالۋىنا جۇمىس ىستەۋدە. مەملەكەت 16,1 ميلليون توننا (جوسپارلانعان جىلدىق كولەمنىڭ 68% -ى) جەم-ءشوپ جينادى. ال ۆەدومستۆوارالىق كوميسسيا 15 تامىزدان باستاپ رەسپۋبليكا ايماعىنان جەم-ءشوپ اكەتۋگە جانە جەمگە ارنالعان استىقتىڭ ەكسپورتىن ۋاقىتشا تىيىم سالۋدى ەنگىزۋ تۋرالى شەشىم قابىلداعان بولاتىن.
بۇگىندە ارال اۋدانىندا توتەنشە جاعدايدى جويۋعا بىرقاتار جۇمىستار اتقارىلىپ جاتىر. قىزىلجار اۋماعىنداعى 15 گەكتار جايىلىمدى، شابىندىق جەرلەردى سۋلاندىرۋ ءۇشىن بەكتاۋ كانالىن تازارتۋ جۇمىستارىن باستادى. جالپى، 8 كانالدى تازالاۋ جوسپاردا تۇر.
