مال ازىعىن دايىنداۋ قاتاڭ باقىلاۋدا

125

ايماق باسشىسى ماحامبەت دوسمۇحامبەتوۆ شۇعىل جيىن وتكىزىپ، وڭىردەگى مال ازىعىن دايىنداۋدىڭ بارىسىن پىسىقتادى.

جيىنعا اۋىل شارۋاشىلىعى سالاسىنىڭ جاۋاپتى ماماندارى مەن سەلەكتورلىق رەجيمدە اۋدان اكىمدەرى قاتىستى.

«قازىردەن باستاپ قىسقى مال ازىعىن دايىنداۋعا قامدانىپ، جەم-ءشوپ جيناۋ ناۋقانىن ءتيىستى دەڭگەيدە اتقارۋىمىز كەرەك. بيىل ەل ىشىندەگى كەيبىر وڭىرلەردە قۋاڭشىلىق بولىپ، قيىنشىلىقتار تۋىنداۋدا. الداعى قىس مەزگىلىندە مال باسىن امان ساقتاپ قالۋ ءۇشىن شۇعىل قامدانۋ قاجەت»،-دەدى م.دوسمۇحامبەتوۆ.

ال، وبلىس اكىمىنىڭ ورىنباسارى قايرات نۇرلىباەۆ بۇل باعىتتاعى اتقارىلىپ جاتقان جۇمىستارعا توقتالدى.
ق.نۇرلىباەۆتىڭ ايتۋىنشا، وبلىستا 184 مىڭعا جۋىق ءمۇيىزدى ءىرى قارا، 591 مىڭ قوي-ەشكى، 95 مىڭنان استام جىلقى مەن 33 مىڭداي تۇيە بولسا، ولارعا 573 700 توننا ءىرى ساباقتى مال ازىعى قاجەت ەتىلمەك.

«بىلتىردان 22100 توننا مال ازىعى قالىپ وتىر. ەندىگى قاجەتتى 551600 توننا ازىقتىڭ 358000 تونناسى ءوز وبلىسىمىزدان دايىندالسا، قالعان 193600 تونناسى وزگە وبلىستاردان كەلىسىم شارت ارقىلى جەر الىپ جانە دايىن ءىرى ساباقتى مال ازىعى ساتىپ الىنباقشى. ال، بۇگىنگى تاڭدا ونىڭ 55,8 مىڭ تونناسى، ياعني 10,1 پايىزى دايىندالعان»،- دەدى ق.نۇرلىباەۆ.

سونداي-اق، ق.نۇرلىباەۆ اتالعان سالاعا بولىنەتىن سۋبسيديانىڭ دا ماڭىزدىلىعىن اتاپ ءوتتى. ايتالىق، بىلتىر وبلىس اكىمىنىڭ قولداۋىمەن 300-دەي شارۋاشىلىقتار مەن شارۋا قوجالىقتارىنا 700 ملن تەڭگەگە جۋىق سۋبسيديا بولىنسە، بيىلعى جىلى دا 600 ملن تەڭگەدەي قاراجات كەرەك ەتىلەتىنىن ايتتى.

قازىرگى ۋاقىتتا ماحامبەت، يندەر اۋداندارى بقو جەرىنەن، يساتاي اۋدانى كاسپي وڭىرىنەن، جىلىوي، ماقات اۋداندارى قىزىلقوعا جانە اقتوبە وبلىسىنىڭ بايعانين اۋدانى جەرلەرىنەن مال ازىعىن دايىنداۋدا.

ءوڭىر باسشىسى ءاربىر اۋداننىڭ جاعدايىن جەكە سۇراپ، اكىمدەرگە ءوز اۋماقتارىنداعى احۋالدى قاتاڭ باقىلاۋدا ۇستاۋدى تاپسىردى.

جيىن سوڭىندا، ماحامبەت دوسمۇحامبەتوۆ مەجەلەگەن جوسپاردى ءتيىستى دەڭگەيدە اتقارۋعا پارمەن بەرىپ، اۋدانداردا مال ازىعىن دايىنداۋ جەدەل شتابىن قۇرۋ كەرەكتىگىن ايتتى. سونىمەن قاتار، جەرگىلىكتى تۇرعىندار جانە ولاردىڭ يەلىگىندەگى تەحنيكالاردى بىرىكتىرە وتىرىپ، ءاربىر اۋىلدىق وكرۋگتەر اۋماعىندا ءشوپ دايىنداۋ بريگادالارىن ۇيىمداستىرۋدى مىندەتتەدى. كورشىلەس وبلىستارمەن سويلەسىپ، ءتيىستى مەموراندۋمدارعا قول قويۋدى تاپسىردى.

پىكىرلەر
رەداكتسيا تاڭداۋى