Mal azyǵyn daıyndaý qatań baqylaýda

127

Aımaq basshysy Mahambet Dosmuhambetov shuǵyl jıyn ótkizip, óńirdegi mal azyǵyn daıyndaýdyń barysyn pysyqtady.

Jıynǵa aýyl sharýashylyǵy salasynyń jaýapty mamandary men selektorlyq rejımde aýdan ákimderi qatysty.

«Qazirden bastap qysqy mal azyǵyn daıyndaýǵa qamdanyp, jem-shóp jınaý naýqanyn tıisti deńgeıde atqarýymyz kerek. Bıyl el ishindegi keıbir óńirlerde qýańshylyq bolyp, qıynshylyqtar týyndaýda. Aldaǵy qys mezgilinde mal basyn aman saqtap qalý úshin shuǵyl qamdaný qajet»,-dedi M.Dosmuhambetov.

Al, oblys ákiminiń orynbasary Qaırat Nurlybaev bul baǵyttaǵy atqarylyp jatqan jumystarǵa toqtaldy.
Q.Nurlybaevtyń aıtýynsha, oblysta 184 myńǵa jýyq múıizdi iri qara, 591 myń qoı-eshki, 95 myńnan astam jylqy men 33 myńdaı túıe bolsa, olarǵa 573 700 tonna iri sabaqty mal azyǵy qajet etilmek.

«Byltyrdan 22100 tonna mal azyǵy qalyp otyr. Endigi qajetti 551600 tonna azyqtyń 358000 tonnasy óz oblysymyzdan daıyndalsa, qalǵan 193600 tonnasy ózge oblystardan kelisim shart arqyly jer alyp jáne daıyn iri sabaqty mal azyǵy satyp alynbaqshy. Al, búgingi tańda onyń 55,8 myń tonnasy, ıaǵnı 10,1 paıyzy daıyndalǵan»,- dedi Q.Nurlybaev.

Sondaı-aq, Q.Nurlybaev atalǵan salaǵa bólinetin sýbsıdııanyń da mańyzdylyǵyn atap ótti. Aıtalyq, byltyr oblys ákiminiń qoldaýymen 300-deı sharýashylyqtar men sharýa qojalyqtaryna 700 mln teńgege jýyq sýbsıdııa bólinse, bıylǵy jyly da 600 mln teńgedeı qarajat kerek etiletinin aıtty.

Qazirgi ýaqytta Mahambet, Inder aýdandary BQO jerinen, Isataı aýdany Kaspıı óńirinen, Jylyoı, Maqat aýdandary Qyzylqoǵa jáne Aqtóbe oblysynyń Baıǵanın aýdany jerlerinen mal azyǵyn daıyndaýda.

Óńir basshysy árbir aýdannyń jaǵdaıyn jeke surap, ákimderge óz aýmaqtaryndaǵy ahýaldy qatań baqylaýda ustaýdy tapsyrdy.

Jıyn sońynda, Mahambet Dosmuhambetov mejelegen jospardy tıisti deńgeıde atqarýǵa pármen berip, aýdandarda mal azyǵyn daıyndaý jedel shtabyn qurý kerektigin aıtty. Sonymen qatar, jergilikti turǵyndar jáne olardyń ıeligindegi tehnıkalardy biriktire otyryp, árbir aýyldyq okrýgter aýmaǵynda shóp daıyndaý brıgadalaryn uıymdastyrýdy mindettedi. Kórshiles oblystarmen sóılesip, tıisti memorandýmdarǵa qol qoıýdy tapsyrdy.

Pikirler
Redakııa tańdaýy