قىزىلوردادا 21 ادامدى الداپ سوققان الاياقتار بەس جىلعا سوتتالدى، دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.
«قىزىلوردا قالالىق پوليتسيا باسقارماسىنا قالا تۇرعىندارى “Befree” اتتى قارجى پيراميداسىنىڭ قۇربانى بولعاندارى جونىندە ارىزدانعان. كەلەڭسىز وقيعا 2019 جىلدىڭ قازان ايىنان باستاۋ العان. بەلگىسىز بىرەۋلەر WhatsApp جەلىسى ارقىلى “Befree” توبىن اشىپ، قارجىلىق (ينۆەستيتسيالىق) پيراميدا قۇرىپ، ولارعا ەكى اپتا ىشىندە 50 پايىزدىق ۇستەمەلىك پايدا تابۋ مۇمكىندىگىن جەتكىزگەن. سالدارىنان 296 ادام سالىمشى رەتىندە تىركەلىپ، جالپى 21 جابىرلەنۋشىگە ماتەريالدىق شىعىن 22 ميلليوننان استام تەڭگە قۇرادى»،— دەلىنگەن حابارلامادا.
قىلمىستىق ءىس بويىنشا قازاقستان رەسپۋبليكاسىنىڭ قىلمىستىق كودەكسىنىڭ 217-بابىنىڭ 3-بولىگىنىڭ 2-تارماعىمەن (قارجىلىق (ينۆەستيتسيالىق) پيراميدانى قۇرۋ جانە وعان باسشىلىق ەتۋ، اسا ءىرى مولشەردە اقشانى نەمەسە وزگە مۇلىكتى تارتا وتىرىپ جاسالعان) سوتقا دەيىنگى تەرگەپ-تەكسەرۋ امالدارى جۇرگىزىلدى.
قازىرگى تاڭدا قىزىلوردا قالالىق سوتىنىڭ شەشىمىمەن ايىپتالۋشىلاردىڭ ارقايسىسىنا 5 جىلعا باس بوستاندىعىنان ايىرۋ تۋرالى شەشىم شىقتى.
«ادىرنا» ۇلتتىق پورتالى
