وڭىردە جۋرناليستەر كۇنىن مەرەكەلەۋ «تاۋمان اماندوسوۆ – جۋرناليست، پەداگوگ، عالىم» اتتى عىلىمي ءىس-شارادان باستاۋ الدى.
ونلاين ۇيىمداستىرىلعان رەسپۋبليكالىق كونفەرەنتسياعا وبلىس اكىمىنىڭ ورىنباسارى باقىتگۇل حامەنوۆا، فيلولوگيا عىلىمدارىنىڭ دوكتورى باۋىرجان جاقىپ، كاكەن حامزين جانە جۋرناليستەر، جوو ستۋدەنتتەرى، ماگيسترانتتار، دوكتورانتتار قاتىستى.
وبلىس اكىمىنىڭ ورىنباسارى باقىتگۇل حامەنوۆا وڭىردەگى جۋرناليستەردى الداعى مەرەكەلەرىمەن قۇتتىقتاپ، شارا قاتىسۋشىلارىنا ايماق باسشىسى ماحامبەت دوسمۇحامبەتوۆتىڭ اتىنان ريزاشىلىعىن ءبىلدىردى.
سونىمەن قاتار، ح.دوسمۇحامەدوۆ اتىنداعى اتىراۋ ۋنيۆەرسيتەتى كەاق باسقارما توراعاسى سالامات يدريسوۆ قر مادەنيەت قايراتكەرى الماس احمەتبەككە «قۇرمەتتى پروفەسسور» كۋالىگىن تابىستادى. سونداي-اق، «راحىمجان وتارباەۆتىڭ رۋحانيات قورى» اتىنان ۋنيۆەرسيتەت ستۋدەنتىنە شاكىرتاقى تاعايىندادى.
جيىن بارىسىندا ەسكەرتكىش ورناتۋ، ت. اماندوسوۆ كوشەسىنە تاقتا ءىلۋ جانە كوگالداندىرۋ سىندى ماسەلەلەر قوزعالدى. سونىمەن قاتار، رەسپۋبليكالىق تاۋمان اماندوسوۆ اتىنداعى قارجىلاي سىيلىقتى قايتادان قولعا الۋ سىندى ۇسىنىستار ايتىلدى.
ايتا كەتەيىك، بيىل قازاقستان جۋرناليستيكاسىنىڭ نەگىزىن سالۋدا جانە ونىڭ ىرگەتاسىن قالىپتاستىرۋدا وزىندىك ورنى بار تۇلعالاردىڭ ءبىرى – جەرلەسىمىز، پروفەسسور، اتىراۋ وبلىسىنىڭ قۇرمەتتى ازاماتى تاۋمان اماندوسوۆتىڭ تۋعانىنا – 100 جىل. ۇيىمداستىرۋشىلاردىڭ ايتۋىنشا، اتۋلى داتاعا وراي بەلگىلى عالىم اتىنداعى رەسپۋبليكالىق عىلىمي كونفەرەنتسيا اتىراۋدا العاش رەت ءوتىپ وتىر.
