پوليتسيا پۋنكتتەرى يساتاي اۋدانىنىڭ ح. ەرعاليەۆ جانە تۇششىقۇدىق اۋىلدارىندا ىسكە قوسىلدى
باستى ەرەكشەلىگى مۇندا - قىزمەتكەردىڭ جانە ونىڭ وتباسىنىڭ ءومىر ءسۇرۋ جاعدايلارى قاراستىرىلعان تۇرعىن-جاي بار. «مۇنداي عيماراتتىڭ اشىلۋى – تۇرعىنداردىڭ قاۋىپسىزدىگى مەن قوعامنىڭ تىنىشتىعىن ساقتاۋعا جانە قىلمىستىڭ الدىن الۋعا زور ىقپالىن تيگىزەرى انىق. 2018 جىلى اتىراۋ وبلىسى اكىمىنە ۇسىنىس بەرىپ، 34 ۋچاسكەلىك پوليتسيا پۋنكتتەرىنىڭ جاڭا عيماراتتارىن سالۋدى جوسپارلاعانبىز، بۇگىندە جوسپار بويىنشا 28 ۋچاسكەلىك پوليتسيا پۋنكتى پايدالانۋعا بەرىلدى»– دەيدى اتىراۋ وبلىسى پوليتسيا دەپارتامەنتىنىڭ باستىعى، پوليتسيا پولكوۆنيگى قامزا ۇمبەتقاليەۆ.
ۋچاسكەلىك پوليتسيا پۋنكتەرىنىڭ اشىلۋ سالتاناتىنا اتىراۋ وبلىسى پوليتسيا دەپارتامەنتىنىڭ باستىعى قامزا ۇمبەتقاليەۆ پەن يساتاي اۋدانىنىڭ اكىمى پولىمبەت حاسانوۆ، ءىىو-ءنىڭ يساتاي اۋدانىنداعى ارداگەرلەرى قاتىستى.
ايتا كەتەيىك، اتىراۋ وبلىسى اۋماعىندا سوڭعى ەكى جىلدا جانادان 28 ۋچاسكەلىك پوليتسيا پۋنكتتەرىنىڭ قۇرىلىسى اياقتالىپ، قولدانىسقا بەرىلدى. اعىمداعى جىلى تاعى 5 ۋچاسكەلىك پوليتسيا پۋنكتتەرى اشىلادى دەپ جوسپارلانۋدا.
