بالاباقشادا بىرەۋدىڭ بالاسىن ۇرىپ، جۇمىستان قۋىلعان تاربيەشى كوپ ۇزاماي ءوز ورنىنا قايتا الىندى. وسىعان نارازى بولعان جامبىل وبلىسىنداعى شاقپاق اتا اۋىلىنىڭ تۇرعىندارى ارنامىزعا شاعىمىن ايتىپ حابارلاستى. ولاردىڭ ايتۋىنشا، بۇلدىرشىنگە قول جۇمساپ، تەرىس قىلىعىمەن تانىلعان تاربيەشى مەكەمە باسشىسىنىڭ بۇيرىعىمەن جۇمىستان شىعارىلعان. الايدا، بالاباقشا ديرەكتورى ەڭبەك دەمالىسىنا كەتە سالا ونىڭ مىندەتىن ۋاقىتشا اتقارۋشى ورىنباسارى قۋىلعان ماماندى جۇمىسقا قايتا قابىلداپ الىپتى. بۇعان اۋىل تۇرعىندارى نارازى. بۇل تۋرالى «ەۋرازيا» ءبىرىنشى ارناسى حابارلايدى.
5 جاسار بالاعا جۇدىرىق جۇمساعان تاربيەشى وسىدان ەكى اي بۇرىن عانا قىزمەتىنەن قۋىلعان بولاتىن. الايدا، مەكەمە مەڭگەرۋشىسى ەڭبەك دەمالىسىنا كەتىسىمەن ونىڭ ورنىنا ۋاقىتشا وتىرعان باسشى قۋىلعان قىزمەتكەردى قايتا جۇمىسقا قابىلداعان.
گۇلباحار كەسەمباەۆا، شاقپاق اتا اۋىلىنىڭ تۇرعىنى:
"نە ءۇشىن الادى، قالعان تاربيەشىلەردىڭ ءبارى ۇرا بەرسىن دەيدى مە؟".
قالدىبەك قۋانىشبەكوۆ، شاقپاق اتا اۋىلىنىڭ تۇرعىنى:
"قازىر بىرەۋىن ۇرسا، ەرتەڭ ەكىنشىسىن ۇرادى. سوندىقتان ءبىز بالالارىمىزدى ۇرعىزىپ قويىپ قاراپ وتىرا بەرمەيمىز عوي، تالاپ ەتەمىز شىعارىلعانىن".
ال مەكەمەگە ۋاقىتشا باسشى بولىپ قالعان قىزمەتكەر مۇنداي شەشىمدى شىعارۋدى اۋداندىق ءبىلىم بولىمىندەگىلەر بۇيىرعانىن ايتادى.
جانار مەيىرمانوۆا، شاقپاق اتا بوبەكجايى مەڭگەرۋشىسىنىڭ ۋاقىتشا مىندەتىن اتقارۋشى:
ء"بىلىم ءبولىمى باسشىسىنىڭ مىندەتىن اتقارىپ جاتقان سالتانات كاۋكاەۆا دەگەن اپكەمىزگە جولىعىپ، سونىمەن قايتا قاراستىرىلىپ، قارالىپ بارىپ جۇمىسقا كەلىپ وتىر".
ەڭبەك دەمالىسىنا كەتكەن مەكتەپكە دەيىنگى مەكەمە مەڭگەرۋشىسى تىپتەن اڭ-تاڭ. ول «ءوز قولىممەن قول قويىپ، ءوزىم شىعارعان بۇيرىقتى بۇزعاندار بەدەلىمدى اياق استى ەتتى» دەپ وتىر.
رابيعا جادىكەەۆا، شاقپاق اتا بوبەكجايىنىڭ مەڭگەرۋشىسى:
"مەن جۇمىستان زاڭدى دەپ تاۋىپ شىعارىپ وتىرعان ادامدى قايتادان كەرى وزدەرى مەنىڭ رۇقساتىمسىز، كەلىسىمسىز، بۇيرىعىمدى بۇزىپ قابىلداپ وتىر عوي. ال ەندى اتا-انالاردان دا ارىزدار ءتۇسىپ جاتىر. باسشى رەتىندە مەن ونى جۇمىستان شىعارماسام ەرتەڭگى كۇنى سىي-قادىرىم دا قالمايتىن شىعار".
جۋالى اۋدانىنداعى ءبىلىم بولىمىندەگىلەر بۇل جاعدايدان ەش حابارسىزبىز دەپ اقتالدى. بىراق، بارىپ، جاعدايدى ءبىلىپ قايتۋعا ۋادە بەردى.
سالتانات قاۋقاەۆا، جۋالى اۋدانى ءبىلىم ءبولىمى باسشىسىنىڭ ۋاقىتشا مىندەتىن اتقارۋشى:
"كوميسسيا تاراپىنان زەردەلەۋ جۇرىزىلگەننەن كەيىن سول جەردە كوميسسيالىق شەشىم قابىلدانادى عوي قانشا دەگەنمەن. ءوز كوزىمەن كورمەگەننەن كەيىن مەن قازىر ەشتەڭە دەي الماي تۇرمىن".
تۇرعىندار مەن تاربيەشى اراسىنداعى تارتىستىڭ ءمان-جايىن ەندى ارنايى كوميسسيا انىقتاماقشى. بىراق اۋىل جۇرتى تاياقتايتىن تاربيەشىنى ورنىنان كەتىرمەي تىنبايمىز دەپ وتىر.
