Balabaqshada bireýdiń balasyn uryp, jumystan qýylǵan tárbıeshi kóp uzamaı óz ornyna qaıta alyndy. Osyǵan narazy bolǵan Jambyl oblysyndaǵy Shaqpaq ata aýylynyń turǵyndary arnamyzǵa shaǵymyn aıtyp habarlasty. Olardyń aıtýynsha, búldirshinge qol jumsap, teris qylyǵymen tanylǵan tárbıeshi mekeme basshysynyń buıryǵymen jumystan shyǵarylǵan. Alaıda, balabaqsha dırektory eńbek demalysyna kete sala onyń mindetin ýaqytsha atqarýshy orynbasary qýylǵan mamandy jumysqa qaıta qabyldap alypty. Buǵan aýyl turǵyndary narazy. Bul týraly «Eýrazııa» birinshi arnasy habarlaıdy.
5 jasar balaǵa judyryq jumsaǵan tárbıeshi osydan eki aı buryn ǵana qyzmetinen qýylǵan bolatyn. Alaıda, mekeme meńgerýshisi eńbek demalysyna ketisimen onyń ornyna ýaqytsha otyrǵan basshy qýylǵan qyzmetkerdi qaıta jumysqa qabyldaǵan.
GÚLBAHAR KESEMBAEVA, ShAQPAQ ATA AÝYLYNYŃ TURǴYNY:
"Ne úshin alady, qalǵan tárbıeshilerdiń bári ura bersin deıdi me?".
QALDYBEK QÝANYShBEKOV, ShAQPAQ ATA AÝYLYNYŃ TURǴYNY:
"Qazir bireýin ursa, erteń ekinshisin urady. Sondyqtan biz balalarymyzdy urǵyzyp qoıyp qarap otyra bermeımiz ǵoı, talap etemiz shyǵarylǵanyn".
Al mekemege ýaqytsha basshy bolyp qalǵan qyzmetker mundaı sheshimdi shyǵarýdy aýdandyq bilim bólimindegiler buıyrǵanyn aıtady.
JANAR MEIIRMANOVA, ShAQPAQ ATA BÓBEKJAIY MEŃGERÝShISINIŃ ÝAQYTShA MINDETIN ATQARÝShY:
"Bilim bólimi basshysynyń mindetin atqaryp jatqan Saltanat Kaýkaeva degen ápkemizge jolyǵyp, sonymen qaıta qarastyrylyp, qaralyp baryp jumysqa kelip otyr".
Eńbek demalysyna ketken mektepke deıingi mekeme meńgerýshisi tipten ań-tań. Ol «Óz qolymmen qol qoıyp, ózim shyǵarǵan buıryqty buzǵandar bedelimdi aıaq asty etti» dep otyr.
RABIǴA JÁDIKEEVA, ShAQPAQ ATA BÓBEKJAIYNYŃ MEŃGERÝShISI:
"Men jumystan zańdy dep taýyp shyǵaryp otyrǵan adamdy qaıtadan keri ózderi meniń ruqsatymsyz, kelisimsiz, buıryǵymdy buzyp qabyldap otyr ǵoı. Al endi ata-analardan da aryzdar túsip jatyr. Basshy retinde men ony jumystan shyǵarmasam erteńgi kúni syı-qadyrym da qalmaıtyn shyǵar".
Jýaly aýdanyndaǵy bilim bólimindegiler bul jaǵdaıdan esh habarsyzbyz dep aqtaldy. Biraq, baryp, jaǵdaıdy bilip qaıtýǵa ýáde berdi.
SALTANAT QAÝQAEVA, JÝALY AÝDANY BILIM BÓLIMI BASShYSYNYŃ ÝAQYTShA MINDETIN ATQARÝShY:
"Komıssııa tarapynan zerdeleý júrizilgennen keıin sol jerde komıssııalyq sheshim qabyldanady ǵoı qansha degenmen. Óz kózimen kórmegennen keıin men qazir eshteńe deı almaı turmyn".
Turǵyndar men tárbıeshi arasyndaǵy tartystyń mán-jaıyn endi arnaıy komıssııa anyqtamaqshy. Biraq aýyl jurty taıaqtaıtyn tárbıeshini ornynan ketirmeı tynbaımyz dep otyr.
