Balabaqşada bıreudıŋ balasyn ūryp, jūmystan quylǧan tärbieşı köp ūzamai öz ornyna qaita alyndy. Osyǧan narazy bolǧan Jambyl oblysyndaǧy Şaqpaq ata auylynyŋ tūrǧyndary arnamyzǧa şaǧymyn aityp habarlasty. Olardyŋ aituynşa, büldırşınge qol jūmsap, terıs qylyǧymen tanylǧan tärbieşı mekeme basşysynyŋ būiryǧymen jūmystan şyǧarylǧan. Alaida, balabaqşa direktory eŋbek demalysyna kete sala onyŋ mındetın uaqytşa atqaruşy orynbasary quylǧan mamandy jūmysqa qaita qabyldap alypty. Būǧan auyl tūrǧyndary narazy. Būl turaly «Euraziia» bırınşı arnasy habarlaidy.
5 jasar balaǧa jūdyryq jūmsaǧan tärbieşı osydan ekı ai būryn ǧana qyzmetınen quylǧan bolatyn. Alaida, mekeme meŋgeruşısı eŋbek demalysyna ketısımen onyŋ ornyna uaqytşa otyrǧan basşy quylǧan qyzmetkerdı qaita jūmysqa qabyldaǧan.
GÜLBAHAR KESEMBAEVA, ŞAQPAQ ATA AUYLYNYŊ TŪRǦYNY:
"Ne üşın alady, qalǧan tärbieşılerdıŋ bärı ūra bersın deidı me?".
QALDYBEK QUANYŞBEKOV, ŞAQPAQ ATA AUYLYNYŊ TŪRǦYNY:
"Qazır bıreuın ūrsa, erteŋ ekınşısın ūrady. Sondyqtan bız balalarymyzdy ūrǧyzyp qoiyp qarap otyra bermeimız ǧoi, talap etemız şyǧarylǧanyn".
Al mekemege uaqytşa basşy bolyp qalǧan qyzmetker mūndai şeşımdı şyǧarudy audandyq bılım bölımındegıler būiyrǧanyn aitady. JANAR MEIIRMANOVA, ŞAQPAQ ATA BÖBEKJAIY MEŊGERUŞISINIŊ UAQYTŞA MINDETIN ATQARUŞY:
"Bılım bölımı basşysynyŋ mındetın atqaryp jatqan Saltanat Kaukaeva degen äpkemızge jolyǧyp, sonymen qaita qarastyrylyp, qaralyp baryp jūmysqa kelıp otyr". Eŋbek demalysyna ketken mektepke deiıngı mekeme meŋgeruşısı tıpten aŋ-taŋ. Ol «Öz qolymmen qol qoiyp, özım şyǧarǧan būiryqty būzǧandar bedelımdı aiaq asty ettı» dep otyr. RABİǦA JÄDIKEEVA, ŞAQPAQ ATA BÖBEKJAIYNYŊ MEŊGERUŞISI:
"Men jūmystan zaŋdy dep tauyp şyǧaryp otyrǧan adamdy qaitadan kerı özderı menıŋ rūqsatymsyz, kelısımsız, būiryǧymdy būzyp qabyldap otyr ǧoi. Al endı ata-analardan da aryzdar tüsıp jatyr. Basşy retınde men ony jūmystan şyǧarmasam erteŋgı künı syi-qadyrym da qalmaityn şyǧar".
Jualy audanyndaǧy bılım bölımındegıler būl jaǧdaidan eş habarsyzbyz dep aqtaldy. Bıraq, baryp, jaǧdaidy bılıp qaituǧa uäde berdı. SALTANAT QAUQAEVA, JUALY AUDANY BILIM BÖLIMI BASŞYSYNYŊ UAQYTŞA MINDETIN ATQARUŞY:
"Komissiia tarapynan zerdeleu jürızılgennen keiın sol jerde komissiialyq şeşım qabyldanady ǧoi qanşa degenmen. Öz közımen körmegennen keiın men qazır eşteŋe dei almai tūrmyn".
Tūrǧyndar men tärbieşı arasyndaǧy tartystyŋ män-jaiyn endı arnaiy komissiia anyqtamaqşy. Bıraq auyl jūrty taiaqtaityn tärbieşını ornynan ketırmei tynbaimyz dep otyr.
