تۇركىستان قالاسىنا كىرەبەرىستە الەمدەگى وزىق تاجىريبەلەردى ۇشتاستىرعان ەڭسەلى مەشىت بوي كوتەردى. جوباعا وزبەكستان رەسپۋبليكاسىنىڭ پرەزيدەنتى شاۆكات ميرزيوەۆ قولداۋ كورسەتۋدە. كورشى وزبەكستان مەملەكەتىنىڭ تۇركىستانعا تارتۋى رەتىندە سالىنىپ جاتقان مەشىتتىڭ قۇرىلىسىن كەلەر جىلى اياقتاۋ جوسپارلانعان. بۇل تۋرالى تۇركىستان وبلىسى اكىمىنىڭ ءباسپاسوز قىزمەتى جازدى.
ساۋلەتى ەرەكشە يسلام ورتالىعىنىڭ ىشكى جانە سىرتقى بەزەندىرىلۋى شىعىستىق ناقىشتا جۇرگىزىلىپ جاتىر. جاڭا جوبا جان-جاقتى زەردەلەنگەن. الەم ەلدەرىندەگى وزىق تاجىريبەلەر ەسكەرىلگەن. مەشىت ىرگەسىنىڭ بەرىك بولۋى ءۇشىن وزىندىك تەحنولوگيا ازىرلەنگەن. وبلىس اكىمى ومىرزاق شوكەەۆ تۇركىستان قالاسىنداعى قۇرىلىس الاڭدارىندا بولدى. جاۋاپتى باسشىلارمەن كەزدەسىپ، تاپسىرمالار جۇكتەدى.
تۇركى الەمىنىڭ رۋحاني تەمىرقازىعى، قاسيەتتى تۇركىستان قالاسىندا سالىناتىن جاڭا عيبرات ورنىندا 5 مىڭ جاماعات ءبىر مەزگىلدە ساجدەگە باس تيگىزىپ، قۇلشىلىق ەتە الادى. مەشىت قۇرىلىسى زامان تالابىنا ساي وزىق ۇلگىدە جۇرگىزىلىپ جاتىر. يسلام ورتالىعىنىڭ جالپى كولەمى – 20 000 شارشى مەتر.
تۇركىستان قالاسىنىڭ اكىمشىلىك-ىسكەرلىك ورتالىعىندا 5, 7, 9, 12 جانە 20 قاباتتى 60 تۇرعىن ءۇي بوي كوتەردى. سونداي-اق اكىمشىلىك عيماراتى بار 20 قاباتتى تۇرعىن ءۇي قۇرىلىسى ءجۇرىپ جاتىر. وبلىس اكىمى «Yassy Tower» بيزنەس ورتالىعىنىڭ قۇرىلىسىمەن تانىستى. اكىمشىلىك-ىسكەرلىك ورتالىقتا ورنالاسقان زاماناۋي عيماراتتىڭ 13 قاباتىندا قۇرىلىس جۇمىستارى ءجۇرىپ جاتىر.
ومىرزاق ەستايۇلى تۇركىستاندا سالىنىپ جاتقان الەمدىك ستاندارتتارعا ساي مۇز ايدىنىندا بولدى. 1200 ادامعا لايىقتالعان مۇز ايدىنى كەلەر جىلى پايدالانۋعا بەرىلەدى.
«ادىرنا» ۇلتتىق پورتالى
