Ózbekstan Túrkistanǵa syı retinde záýlim meshit salyp jatyr

601

Túrkistan qalasyna kireberiste álemdegi ozyq tájirıbelerdi ushtastyrǵan eńseli meshit boı kóterdi. Jobaǵa Ózbekstan Respýblıkasynyń Prezıdenti Shavkat Mırzııoev qoldaý kórsetýde. Kórshi Ózbekstan memleketiniń Túrkistanǵa tartýy retinde salynyp jatqan meshittiń qurylysyn keler jyly aıaqtaý josparlanǵan. Bul týraly Túrkistan oblysy ákiminiń baspasóz qyzmeti jazdy.

Sáýleti erekshe Islam ortalyǵynyń ishki jáne syrtqy bezendirilýi shyǵystyq naqyshta júrgizilip jatyr. Jańa joba jan-jaqty zerdelengen. Álem elderindegi ozyq tájirıbeler eskerilgen. Meshit irgesiniń berik bolýy úshin ózindik tehnologııa ázirlengen. Oblys ákimi Ómirzaq Shókeev Túrkistan qalasyndaǵy qurylys alańdarynda boldy. Jaýapty basshylarmen kezdesip, tapsyrmalar júktedi.
Túrki áleminiń rýhanı temirqazyǵy, qasıetti Túrkistan qalasynda salynatyn jańa ǵıbrat ornynda 5 myń jamaǵat bir mezgilde sájdege bas tıgizip, qulshylyq ete alady. Meshit qurylysy zaman talabyna saı ozyq úlgide júrgizilip jatyr. Islam ortalyǵynyń jalpy kólemi – 20 000 sharshy metr.

Túrkistan qalasynyń ákimshilik-iskerlik ortalyǵynda 5, 7, 9, 12 jáne 20 qabatty 60 turǵyn úı boı kóterdi. Sondaı-aq ákimshilik ǵımaraty bar 20 qabatty turǵyn úı qurylysy júrip jatyr. Oblys ákimi «Yassy Tower» bıznes ortalyǵynyń qurylysymen tanysty. Ákimshilik-iskerlik ortalyqta ornalasqan zamanaýı ǵımarattyń 13 qabatynda qurylys jumystary júrip jatyr.

Ómirzaq Estaıuly Túrkistanda salynyp jatqan álemdik standarttarǵa saı muz aıdynynda boldy. 1200 adamǵa laıyqtalǵan muz aıdyny keler jyly paıdalanýǵa beriledi.

«Adyrna» ulttyq portaly

Pikirler
Redakııa tańdaýy