بۇگىندە ءاربىر ەل ازاماتىنا ءوز كاسىبىن يگەرۋگە مەملەكەت تاراپىنان بارىنشا جاعداي جاسالىپ وتىر. كەيىنگى جىلدارى كاسىپكەرلىك سالاسىنا جاسالىپ جاتقان جان-جاقتى قولداۋلاردىڭ ارقاسىندا اۋداندا وڭدى وزگەرىستەر كورىنىس بەرىپ كەلەدى. سونىڭ ءبىرى مەملەكەت قولداۋىمەن قايتارىمسىز قارجىعا قول جەتكىزىپ، بەرىلگەن قاراجاتىن پايدالى ىسكە جۇمساپ جاتقان ەڭبەكشىقازاق اۋىلىنىڭ تۇرعىنى الميرا داۋلەتوۆا.
كەيىپكەرىمىز الميرا ەش جەردە جۇمىس ىستەمەيدى. اۋلاسىندا تاۋىق ءوسىرىپ كۇنەلتىپ وتىر. باستاپقىدا بۇل ىستە ەش تاجىريبەسى جوق جاس انا جۇرەكسىنگەنىمەن، كەيىن كەلە كاسىپتىڭ قىر-سىرىنا قانىعا باستايدى.
«بيزنەس-باستاۋ» جوباسى ارقىلى مەملەكەتتەن قايتارىمسىز قارجى الدىم. ول اقشاعا 100 لومانن براۋن نەمىس تۇقىمدى تاۋىعىن جانە سىيىمدىلىعى 350 جۇمىرتقاعا جەتەتىن ينكۋباتور، قاجەتتى جەم-ءشوپ الىپ، كاسىپتى باستاپ كەتتىم. سالادا تاجىريبەم از بولعاندىقتان كوپ ۇزاماي بالاپاندارىمنىڭ ءبىرازى ءولدى. سول كەزدە قۇس باعۋدا تاجىريبەسى بار جەرلەستەرىممەن اقىلداسىپ، دارۋمەن بەرۋ، جەم سالۋ جانە باعۋ جايىندا كەڭەس الدىم. قازىر ەپتەپ كاسىپتىڭ قىر-سىرىنا قانىعىپ كەلەمىن. جولداسىم بەرىكتىڭ كومەگىمەن جاڭا قورا تۇرعىزىپ، تاۋىقتارعا ىڭعايلى جاعداي جاسادىق، بالاپاندار كورشىلەرىمىزدىڭ باۋ-باقشاسىنا تۇسپەسىن دەپ، ءۇيدىڭ اينالاسىن جاقسىلاپ قورشادىق. وسى ايدا ورتاشا ەسەپپەن 1700 جۇمىرتقا الامىز دەپ جوسپارلاپ وتىرمىز. قۇس اسىراۋدىڭ ەش قيىندىعى جوق. باستىسى، كۇتىمى مەن جەم-ءشوبى ۋاقىتىلى بولسا بولعانى،»،-دەيدى الميرا داۋلەتقىزى.
سوزىنشە، قازىر حالىقتىڭ تابيعي تازا جۇمىرتقاعا دەگەن سۇرانىسى ارتقان. جۇمىرتقانى اپتا سايىن ۇلكەن بازارعا شىعارىپ وتكىزەمىز. شارۋامدى باستاپ، جۇرگىزۋگە جەرگىلىكتى اكىمدىك كوپ كومەگىن تيگىزدى. اتاۋلى الەۋمەتتىك كومەك الاتىنمىن. قۇجاتتارىمدى جاڭارتىپ وتكىزۋگە بارعانىمدا، وسى مەملەكەتتىك جوبا جايىندا ايتىپ، ءتۇسىندىرىپ بەردى. سۇيەمەلدەۋ كورسەتىپ، باسىنان اياعىنا دەيىن كومەكتەستى. ال، «اتامەكەن» كاسىپكەرلەر پالاتاسىنىڭ مەنەدجەرلەرى بيزنەس-جوسپار قۇرۋ، قاجەتتى ەسەپتەردى جۇرگىزۋ، جەكە كاسىپكەرلىكتى اشۋعا جاردەمدەستى. وسىنىڭ بارلىعى ءۇشىن مەملەكەتكە جانە حالىقتىڭ ءال-اۋقاتىن جاقسارتۋعا ارنالعان مەملەكەتتىك باعدارلامالارعا العىسىم شەكسىز. كىشكەنتاي بالام وتە سيرەك كەزدەسەتىن اۋرۋعا شالدىققان. تۋماسىنان مۇگەدەك. ەرەكشە كتىمدى قاجەت ەتەدى. سوندىقتان قانداي دا ءبىر قىزمەتكە ورنالاسۋ مۇمكىن بولمادى. ءبىز سياقتى شاراسىز قالعاندارعا ۇلكەن كومەك قوي بۇل»،-دەيدى كەيىپكەرىمىز.
ال، الميرانىڭ اناسى قىزىنىڭ بالا كۇنىنەن شارۋاعا بەيىم، مالساق ءارى ەڭبەكقور ەكەنىن، كىشكەنتاي كۇنىنەن جەر تەۋىپ، جەمتىگىن ىزدەگەن تاۋىقتى باقىلاعاندى جاقسى كورەتىنىن جەتكىزدى.
سالا ماماندارىنىڭ سوزىنشە، قاراپايىم تۇرعىندار، اسىرەسە، شالعاي اۋىلدا تۇراتىندار ءۇشىن يگى باستامانىڭ تيىمدىلىگى وتە مول. ويتكەنى بۇل جوباعا تەك جۇمىسسىزدار مەن ءوزىن-ءوزى جۇمىسپەن قامتۋشىلار عانا قاتىسا الادى. جەكە كاسىبىن اشۋعا نيەتتەنگەندەرگە كورسەتىلەتىن بۇل قولداۋ سوڭعى 2-3 جىلدا كوپتەگەن اۋىل تۇرعىنىنىڭ تىرلىگىن تىكتەۋگە سەپ بولدى.
جوبانىڭ ءتيىمدى تۇستارىنىڭ ءبىرى – مۇنداعى ءبىر ايلىق وقۋعا قاتىسقاندارعا شاكىرتاقى دا قاراستىرىلعان. كاسىبىن اشۋعا نيەتتەنگەندەرگە بىلىكتى بيزنەس-ترەنەرلەر ءدارىس بەرىپ، كاسىپكەرلىكتىڭ قىر-سىرىنا ۇيرەتەدى. ماسەلەن، كوكسۋ اۋدانى بويىنشا بيىلدىڭ وزىندە 60-قا جۋىق تۇرعىن قايتارىمسىز گرانتقا يە بولسا، ولارعا بارلىعى 34 ميلليون 981 مىڭ تەڭگە قارجى ءبولىنىپتى.
دالىرەك ايتار بولساق، 21 كوپبالالى وتباسىلار، 18-29 جاس ارالىعىنداعى 9 جاس جانە مۇمكىندىگى شەكتەۋلى 1 ازامات 583 مىڭ تەڭگە كولەمىندەگى قايتارىمسىز گرانتقا قول جەتكىزگەن. ونىڭ ىشىندە 25 ازامات مال شارۋاشىلىعىنا قاتىستى كاسىپ باستاسا، 3 ازامات قۇس شارۋاشىلىعىن دامىتۋدى قولعا الىپتى. وڭىرىمىزدە «ءوز ءىسىمدى باستاسام» دەگەندەرگە كورسەتىلىپ جاتقان قولداۋ مەن دەمەۋ از ەمەس كورىنەدى. جىل سوڭىنا دەيىن تاعى 10 كاسىپكەرگە قولداۋ جاسالادى دەيدى.
