تۇركيانىڭ مۇعلا پروۆينتسياسىندا اۋا رايىنىڭ اپتاپ ىستىعىنا بايلانىستى الاپات ءورت شىقتى. ءورتتىڭ كۇشتى بولعانى سونشالىقتى، قالىڭ نۋلى ورمانداردى جايپاپ، جاعاجايداعى دەمالىس ورىندارىنا دا جەتتى.
ماماندار ءورتتىڭ شىعۋ سەبەبى ەلەكتر ترانسفورماتورىنىڭ اقاۋىنان بولعان دەپ بولجام جاساپ وتىر. ەكىنشى سەبەبى، ءورتتى قولدان قاساقانا جاسادى دەگەن دەرەكتەر دە بار. ءورت سالدارىنان جاعاجايدا دەمالىپ جاتقان تۋريستتەردىڭ دە زارباپ شەككەنى جايىندا اقپاراتتىر شىقتى. قايتىس بولعان ادامداردىڭ دا دەرەگى تىركەلدى. جاعاجايدا ورنالاسقان كەيبىر ياحتالار مەن كاتەرلەر دە ورتەنىپ كەتكەن.
اۋا رايىن بولجاۋشى ماماندار الداعى ۋاقىتتاردا اۋا رايىنىڭ اپتاپ ىستىعى جالعاسادى دەپ بولجاۋدا. سوعان بايلانىستى قازىر ەل ۇكىمەتى جەدەل قاۋىپسىزدىك شارالارىنا كىرىستى.
قازىرگى مالىمەتتەر بويىنشا تۇركيادا 2000 گەكتەر القاپتاعى ورماندار جويىلىپ كەتكەن. ءورتتىڭ شارپىعان اۋماعى 4 ەسەگە دەيىن ۇلعايعان.
وسى تابيعي اپاتقا بايلانىستى قر ءسىم رەسمي اقپارات بەردى. مينيسترلىكتىڭ ايتۋىنشا، تۇركيادا ورتتەن زارداپ شەككەن قازاقستان ازاماتتارى جوق.
بەكبولات قارجان،
"ادىرنا" ۇلتتىق پورتالى
