بۇگىن "Nur Otan" پارتياسى جانىنداعى "Jas Otan" جاستار قاناتىنىڭ باستاماسىمەن اقتوبە وبلىسىنان ماڭعىستاۋ وڭىرىنە 1000 بۋما ءشوپ جىبەرىلدى دەپ حابارلايدى "ادىرنا" ۇلتتىق پورتالىنىڭ ءتىلشىسى.
"Jas Otan" جاستار قاناتى قۋاڭشىلىقتىڭ سالدارىنان ءتورت تۇلىگىنە ازىق تاپپاي قىسىلعان ماڭعىستاۋ وڭىرىنە رەسپۋبليكا كولەمىندە كومەك كورسەتۋ ماقساتىندا ىزگىلىكتى ءىستى جۋىردا قولعا العان بولاتىن. وسى باستاماعا جاستار قاناتىنىڭ ءار وڭىردەگى فيليالدارى جۇمىلىپ، جاس دەپۋتاتتار كورپۋسى مەن كومەككە قول سوزۋعا نيەتتى قايىرىمدى ازاماتتار قولداۋ ءبىلدىردى. سونىمەن قاتار بۇل ىسكە «Biz birgemiz» ەرىكتىلەر قوزعالىسىنىڭ مۇشەلەرى دە جۇمىلدىرىلدى.
ماڭعىستاۋ وبلىسىنا مال ازىعى اقتوبە ءوڭىرى ارقىلى جىبەرىلەتىن بولعاندىقتان، بۇل ىزگىلىكتى ءىستى ۇيىمداستىرۋ جانە ۇيلەستىرۋ جۇمىستارى "Jas Otan" جاستار قاناتى اقتوبە وبلىستىق فيليالىنا جۇكتەلدى. كۇنى كەشە يگىلىكتى ءىس مارەسىنە جەتتى.
اقتوبەلىك جاستار تەمىر اۋدانىنىڭ ورتالىعى شۇبارقۇدىق اۋىلىنىڭ ماڭىنداعى شابىندىق القابىنان مال ازىعىن تيەپ، جۇك كولىگىن ماڭعىستاۋ وڭىرىنە جونەلتتى. قاشان دا يگىلىكتى ىستەردىڭ باسىندا جۇرەتىن جاستار قاناتى وسىلايشا تاعى ءبىر باستامانى جۇزەگە اسىردى.
— بۇل باستاما — ءبىزدىڭ عانا ەمەس، بارشا جاسوتاندىقتاردىڭ يدەياسى. وسىنداي قيىن كەزەڭدە كورشىلەس وبلىستارعا قولداۋ كورسەتۋ ءبىزدىڭ قامقورلىعىمىز مەن ازاماتتىعىمىزدى بىلدىرەدى. الداعى ۋاقىتتا دا مۇنداي يگى ىستەر جالعاسىن تابادى، — دەيدى "Jas Otan" جاستار قاناتى وبلىستىق فيليالىنىڭ توراعاسى ءانۋار يسكارين.
"ادىرنا" ۇلتتىق پورتالى.
