Búgin "Nur Otan" partııasy janyndaǵy "Jas Otan" jastar qanatynyń bastamasymen Aqtóbe oblysynan Mańǵystaý óńirine 1000 býma shóp jiberildi dep habarlaıdy "Adyrna" ulttyq portalynyń tilshisi.
"Jas Otan" jastar qanaty qýańshylyqtyń saldarynan tórt túligine azyq tappaı qysylǵan Mańǵystaý óńirine respýblıka kóleminde kómek kórsetý maqsatynda izgilikti isti jýyrda qolǵa alǵan bolatyn. Osy bastamaǵa jastar qanatynyń ár óńirdegi fılıaldary jumylyp, jas depýtattar korpýsy men kómekke qol sozýǵa nıetti qaıyrymdy azamattar qoldaý bildirdi. Sonymen qatar bul iske «Biz birgemiz» eriktiler qozǵalysynyń músheleri de jumyldyryldy.
Mańǵystaý oblysyna mal azyǵy Aqtóbe óńiri arqyly jiberiletin bolǵandyqtan, bul izgilikti isti uıymdastyrý jáne úılestirý jumystary "Jas Otan" jastar qanaty Aqtóbe oblystyq fılıalyna júkteldi. Kúni keshe ıgilikti is máresine jetti.
Aqtóbelik jastar Temir aýdanynyń ortalyǵy Shubarqudyq aýylynyń mańyndaǵy shabyndyq alqabynan mal azyǵyn tıep, júk kóligin Mańǵystaý óńirine jóneltti. Qashan da ıgilikti isterdiń basynda júretin jastar qanaty osylaısha taǵy bir bastamany júzege asyrdy.
— Bul bastama — bizdiń ǵana emes, barsha jasotandyqtardyń ıdeıasy. Osyndaı qıyn kezeńde kórshiles oblystarǵa qoldaý kórsetý bizdiń qamqorlyǵymyz men azamattyǵymyzdy bildiredi. Aldaǵy ýaqytta da mundaı ıgi ister jalǵasyn tabady, — deıdi "Jas Otan" jastar qanaty oblystyq fılıalynyń tóraǵasy Ánýar Iskarın.
"Adyrna" ulttyq portaly.
