جازۋشى، اقىن سوفى سماتاەۆتىڭ جارى ومىردەن ءوتتى

6359
Adyrna.kz Telegram

زامانىمىزدىڭ كورنەكتى جازۋشىسى، اقىن، دراماتۋرگ سوفى سماتاەۆتىڭ جارى ءشامشيا سماتاەۆا ومىردەن ءوتتى دەپ حابارلايدى "ادىرنا" ۇلتتىق پورتالى.

بۇل اقپاراتتى قازاق راديوسىنىڭ ساندۋعاشى اتانعان ديكتور ساۋىق جاقانوۆا راستادى.

«جۋىردا عانا سوفى اعامىزدىڭ 80 جىلدىق مەرەيتويىندا جەڭگەمىزبەن كەزدەسىپ، داستارقانداس بولعان ەدىك. ول كىسى سونداي اقجارقىن، مەيىرىمدى، كوپشىل ادام ەدى. مەن ءوز ومىرىمدە ول كىسىنى ەكى-اق رەت كوردىم. ول كىسىنىڭ بولمىسى وزگەشە ەدى. سوفى اعامىزدى ەرەكشە سىيلايتىن، جاعدايىن جاساپ، قاس-قاباعىنا قاراپ وتىراتىن. "كوپ نارسە شىعارماشىلىق ادامىنىڭ ومىرلىك جارىنا بايلانىستى" دەگەن ءسوز بار، سول سياقتى سوفى اعامىزدىڭ وسىنداي اتاق-ابىرويعا جەتۋىنە وتباسىنداعى جارىنىڭ دا ۇلەسى زور دەپ ويلايمىن. قارالى حاباردى ەستىپ، ءبىراز قايعىرىپ قالدىق. اللا الدىنان جارىلقاسىن", — دەدى س.جاقانوۆا.

ءشامشيا سماتاەۆا جايلى باسىلىم بەتتەرىندە كوپ دەرەك بولماسا دا، ول كىسى تۋرالى سوفى اعامىزدىڭ ءبىر سۇحباتىندا ايتقانى ەل جادىندا ساقتالىپ قالدى دەپ ويلايمىز. ول:

«جان جارىم – اق بانتيگى كوز الدىمدا كوبەلەكتەي كولبەڭدەگەن، جاستايىمىزدان ءبىر اۋىلدا بىرگە ءوسىپ، ءبىر ۇمىتكە بىرگە ىلەسكەن، ءبىر ارماندى بىرگە اڭساعان ءشامشيا حانىم. قوس جۇرەكتەگى ىستىق ىڭكارلىكتى قوسىپ الىپ، اق وتاۋىمىزدى كوتەرىپ اق ورداعا اينالدىردىق دەسەم، ارتىقتاۋ بولماس تا. شەكتەن تىس كوبەيگەن ىڭقىل-سىڭقىلىمنىڭ، كەسەل-دەرتىمنىڭ ەمشىسى – جان جارىم، شاكەمنىڭ-شاحمينامنىڭ بايەك بولعىش تىرلىگى، ايالاعىش الاقانى»، — دەگەن بولاتىن.

سونداي-اق ول زايىبىمەن ومىردە تاتۋ-ءتاتتى عۇمىر كەشىپ، الماس، ماناس، جانار ەسىمدى ۇل-قىز وسىرگەنىن ايتقان.

ءبىز جازۋشى اعامىزعا، ونىڭ وتباسىنا، تۋعان-تۋىستارىنا قايعىلارىنا ورتاقتاسىپ كوڭىل ايتامىز.

 

"ادىرنا" ۇلتتىق پورتالى.

پىكىرلەر