اقتوبە وبلىسىندا اسكەرگە شاقىرۋ پۋنكتى سالىنىپ جاتىر

2889
Adyrna.kz Telegram

اقتوبە وبلىسىنىڭ حرومتاۋ قالاسىندا قورعانىس ىستەرى جونىندەگى دەپارتامەنتىنىڭ جانىنان زاماناۋي تالاپتارعا ساي سالىنىپ جاتقان اسكەرگە شاقىرۋ پۋنكتىنىڭ عيماراتى اياقتالۋعا جاقىن. بۇل – ەل تاۋەلسىزدىگىنىڭ 30 جىلدىعىنا وراي سالىنىپ جاتقان ەلىمىزدەگى قورعانىس سالاسىنداعى ءىرى جوبالاردىڭ ءبىرى.

اتالعان عيمارات بيىل تامىز ايىنىڭ اياعىندا، ياعني قازاقستان رەسپۋبليكاسى كونستيتۋتسياسى كۇنىنە وراي اشىلماق.

اقتوبە وبلىستىق قورعانىس ىستەرى جونىندەگى دەپارتامەنتىنىڭ باستىعى پودپولكوۆنيك ادىلەت وتارباەۆتىڭ ايتۋىنشا، حرومتاۋ قالاسىندا سالىنىپ وتىرعان اسكەرگە شاقىرۋ پۋنكتى — سوڭعى ۇلگىدەگى تالاپتارعا ساي سالىنىپ وتىرعان عيماراتتاردىڭ العاشقىسى. كەلەسى كەزەكتە جوسپاردا شالقار اۋداندىق قورعانى ىستەرى جونىندەگى دەپارتامەنتىنىڭ جاڭا عيماراتى بار. بۇل قۇرىلىستىڭ دا جوبالىق-سمەتالىق قۇجاتتارى دايىن تۇر.

عيماراتتا اسكەرگە شاقىرىلۋشىلاردى مەديتسينالىق تەكسەرىستەن وتكىزۋگە ارنالعان ارنايى دارىگەرلىك كوميسسيا جۇمىسى ءۇشىن بارلىق جاعدايلار قاراستىرىلعان. سونىمەن قاتار، ونىڭ ىشىندە اسكەري-پاتريوتتىق بولمەسى دە بولادى. مۇندا وڭىردە اسكەري بورىشىن اتقارعان ازاماتتارىمىز تۋرالى، قاي اسكەر تۇرلەرى مەن تەكتەرىندە قىزمەت اتقارعانى، ولاردىڭ اسكەردەگى جەتىستىكتەرى تۋرالى دا ماعلۇماتتار ساقتالادى، اقپاراتتار بەرىلەتىن بولادى.

 

— اسكەري-پاتريوتتىق، ۇگىت-ناسيحات جۇمىستاردىڭ بەلسەندى جۇرگىزىلۋى اسكەرگە شاقىرىلۋشى ازاماتتاردىڭ ءوز وتانىن قورعاۋعا دەگەن جاۋاپكەرشىلىگىنە اسەر ەتەتىن ماڭىزدى فاكتورلاردىڭ ءبىرى. سوندىقتان ارنايى وسىنداي اقپاراتتىق بولمە ارناۋدى ءجون كوردىك، دەيدى اقتوبە وبلىسى حرومتاۋ اۋدانىنىڭ قورعانىس ىستەرى جونىندەگى ءبولىم باستىعى پودپولكوۆنيك رۋسلان بالتەمىروۆ.

ونىڭ ايتۋىنشا، حرومتاۋ اۋدانىنان جىل سايىن 150-گە جۋىق ازامات اسكەري مىندەتىن اتقارۋعا اتتانادى. اقتوبە وبلىسىنىڭ حرومتاۋ قالاسى ءوندىرىس ورنى ورنالاسقان بولاشاعى مول قالا ەكەنىن ەسكەرسەك، كەلەشەكتە بۇل كورسەتكىش بۇدان دا ارتاتىنى انىق.

ايتا كەتۋ كەرەك، بۇگىندە قارۋلى كۇشتەردى كەلىسىم شارتتى اسكەري قىزمەتكە شاقىرىلۋشىلارمەن قامتاماسىز ەتۋ، قارۋلى كۇشتەردىڭ رەزەرۆىن قۇرۋ جۇمىلدىرۋ جۇمىستارى دا وسى قورعانىس ىستەرى دەپارتامەنتتەرى ارقىلى جىل بويى ۇزدىكسىز جۇرگىزىلىپ وتىرادى. سوندىقتان اسكەرگە شاقىرۋ پۋكتىنىڭ جاڭا عيماراتىنىڭ سالىنۋى كۇن تارتىبىندەگى كەزەك كۇتتىرمەس ماڭىزدى ماسەلە بولىپ تابىلادى.

بيىلعى جىلى اسكەرگە شاقىرىلۋشىلار قاتارىنا اقتوبە قالاسىنان جانە وبلىس اۋداندارىنان 3 مىڭنان استام ازامات تىركەلگەن. اسكەرگە شاقىرۋ ناۋقانى كوكتەم جانە كۇز مەزگىلدەرىندە وتكىزىلەتىنى بەلگىلى. جىل سايىن وبلىستان 2 مىڭعا جۋىق سارباز ۇلتتىق قاۋىپسىزدىك كوميتەتىنە، شەكارا قىزمەتىنە جانە ۇلتتىق ۇلانعا اسكەري بورىشىن وتەۋگە اتتانادى. كەلىسىمشارت بويىنشا ەلىمىزدە 30 جاسقا دەيىن اسكەري قىزمەتكە، 32 جاسقا دەيىن وفيتسەرلىك نەمەسە اعا سەرجانت لاۋازىمدارىنا تاعايىندالۋعا مۇمكىندىك بەرىلگەن.

 

                                                                 "ادىرنا" ۇلتتىق پورتالى.

پىكىرلەر