كۇنى كەشە قورعانىس مينيسترلىگىنىڭ بىتىمگەرشىلىككە دايىندىق ورتالىعىنىڭ جەكە قۇرامى تۇراقتى قانمەن تولىقتىرىلۋعا جانە الماتى قالاسىنداعى مەديتسينالىق مەكەمەلەردىڭ پاتسيەنتتەرىنە ساپالى ترانسفۋزيالىق كومەك كورسەتۋگە ۇلەس قوستى. اسكەري قىزمەتشىلەر 13 ليترگە جۋىق قان تاپسىردى. بۇل ولشەۋسىز ۇلەس، جۇزدەگەن، بالكي مىڭداعان ادامنىڭ ءومىرىن ساقتاپ قالاتىن ىزگى ءىس.
الەمدىك كوروناۆيرۋستىق پاندەميا جاعدايىندا ۇنەمى قانمەن قامتاماسىز ەتۋ وتە ماڭىزدى بولىپ وتىر. سوندىقتان دا اسكەريلەر ءومىرى قىل ۇستىندە تۇرعان جانداردىڭ جانىن ساقتاپ قالۋ ماقساتىندا ۇنەمى ارىپتەستىك تانىتىپ، دونور بولۋعا قاشاندا دايىن. بۇل تۋرالى بىتىمگەرشىلىك پەن تىلدىك دايىندىقتى تالداۋ جانە باقىلاۋ ءبولىمىنىڭ باستىعى پولكوۆنيك رۋسلان ماەرمانوۆ مالىمدەدى.
«بىزگە حابارلاعانداي، بالالار كلينيكاسىنداعى ناۋقاس قان قۇيۋعا وتە مۇقتاج كورىنەدى. ءبىز بالاعا كومەكتەسكىمىز كەلەدى جانە تەزىرەك ساۋىعىپ كەتۋىن تىلەيمىز. اسكەري قىزمەتشىلەر قازاقستان تاۋەلسىزدىگىنىڭ 30 جىلدىعىنا ورايلاستىرىلعان «ىزگى ىستەر مارافونى» ۇلتتىق جوباسىنا بەلسەندى قاتىسادى جانە مەديتسينالىق مەكەمەلەردىڭ مۇنداي وتىنىشتەرىنە جەدەل جاۋاپ بەرەدى» دەدى ول.
جالپى بىتىمگەر تەك قانا دونور بولىپ قان تاپسىرمايدى، وتان ءۇشىن جات جەردە جاندا تاپسىرادى. مىڭداعان قازاق بىتىمگەرلەرى تاجىكستاننىڭ تاۋلى قىراتى مەن شاتقالىندا شايقاسىپ، لاڭكەستىكتىڭ وتى جانعان قاۋىپتى ۇيىمىزگە وتكىزبەۋ ءۇشىن قان توكتى. 1992-1997 جىلدارى بىتىمگەرلىك ميسسياسىمەن تاجىكستاندا بولعان قازاقستان بىتىمگەرلەرىنىڭ 57 ساربازى سولايشا كوز جۇمدى. جات جەردە، تۋعان جەردىڭ اسپانى اشىق بولۋ ءۇشىن ەرلىك كورسەتتى.
2003 جىلدان باستاپ يراكتا سوعىس بۇرق ەتە قالعان ساتتە دە، قازاقستان بىتىمگەرلەرى سوعىس وشاعىنا اتتانىپ، 4 ملننان استام جارىلعىش زاتتى زالالسىزداندىردى. سول ارقىلى ون مىڭداعان يراكتىق بەيبىت تۇرعىنداردىڭ، بالالار مەن ايەلدەردىڭ ءومىرىن ساقتاپ قالدى. بىتىمگەرلىك ميسسيانى ورىنداۋ بارىسىندا قازاقستاندىق سارباز جارىلىستان قازا تاپقان ەدى.
ارتىنشا ليۆان مەن افريكا مەملەكەتتەرىندە قازاقستاننىڭ بىتىمگەرلىك كۇشتەرى ءوز ميسسيالارىن ورىنداۋعا اتتاندى. ولار قاۋىپتى ايماقتاعى تىنىشتىق رەجيمىن ساقتاۋعا بارىن سالىپ كەلەدى. افريكا مەملەكەتىندە لاڭكەستىك ۇيىمداردان ارەكەتىنە، جاۋلاسۋشى تاراپتاردىڭ اراسىنداعى بەيبىت كەلىسىمنىڭ ساقتالۋىنا ۇلەس قوسۋدا. بۇل ادامدىق ميسسيا. قازاقستان بىتىمگەرلىك كۇشتەرى ءدال وسىنداي قىزمەتتەردى اتقارعان، اتقارا بەرمەك تە. بەيبىت كۇندە قان تاپسىرىپ، دونور بولعان جاۋىنگەرلەر، جات جەردە مەملەكەتتىك، ادامدىق مۇددەنى قورعاپ، قيان ميسسيالاردى دا ءساتتى اتقارۋعا ساقاداي ساي سايىپقىراندار.
"ادىرنا" ۇلتتىق پورتالى
