بەلگىلى جۋرناليست، Túrkistan حالىقارالىق گازەتىنىڭ باس رەداكتورى قۋات اۋەسباي «باس رەداكتورلار كلۋبى» قوعامدىق بىرلەستىگىنىڭ ۆيتسە-پرەزيدەنتى بولىپ سايلاندى. مۇنداي شەشىم كلۋب مۇشەلەرىنىڭ باسقوسۋىندا قابىلداندى.
باسقوسۋعا باس رەداكتورلار كلۋبىنىڭ پرەزيدەنتى بيبىگۇل جەكسەنباي، ۆيتسە-پرەزيدەنت مۇراتبەك توقتاعازين، اتقارۋشى ديرەكتور اسەم ەسىلباەۆا، كلۋب مۇشەسى «ءبىلىمدى ەل» رەسپۋبليكالىق گازەتىنىڭ باس رەداكتورى ءلاززات تۇركىستانوۆا قاتىستى.
كلۋبتىڭ پاندەميا جاعدايىندا اتقارعان جۇمىسى مەن ۇيىمداستىرعان ءىس-شارالارى تۋرالى اتقارۋشى ديرەكتور ءا.ەسىلباەۆا باياندادى. بۇدان كەيىن باس رەداكتورلار كلۋبىنىڭ پرەزيدەنتى بيبىگۇل جەكسەنباي بەلگىلى جۋرناليست، رەسپۋبليكالىق Sport گازەتىنىڭ باس رەداكتورى، كلۋبتىڭ ۆيتسە-پرەزيدەنتى بولعان، بيىل دۇنيەدەن وتكەن ءدۇرالى دۇيسەبايدى ەسكە الىپ، قالامگەردىڭ اتقارعان جۇمىسى، جالپى قازاق جۋرناليستيكاسىنا سىڭىرگەن ەڭبەگى ەلەۋلى ەكەنىن ايتتى.
بۇدان كەيىن بيبىگۇل نۇرعاليقىزى كلۋبتىڭ جاڭا ۆيتسە-پرەزيدەنتى قىزمەتىنە قۋات اۋەسبايدىڭ كانديداتۋراسىن ۇسىندى. باسقوسۋعا قاتىسقان جانە ونلاين قوسىلعان كلۋب مۇشەلەرىنىڭ داۋىس بەرۋى ناتيجەسىندە بۇل ۇسىنىس ءبىراۋىزدان قولداۋ تاپتى. جاڭا ۆيتسە-پرەزيدەنتكە حالىقارالىق ۇيىمدارمەن بايلانىستى كۇشەيتىپ، شەتەلدەگى قازاق ءتىلدى باق-پەن تىعىز قارىم-قاتىناس جاساۋ باعىتىندا بىرقاتار تاپسىرمالار بەرىلدى.
