قر دەنساۋلىق ساقتاۋ ءمينيسترى الەكسەي تسوي بالالاردى كوروناۆيرۋسقا قارسى ۆاكتسينالاۋ تۋرالى سۇراققا جاۋاپ بەردى، دەپ حابارلايدى «ادىرنا» ۇلتتىق پورتالى Sputnik قازاقستان سايتىنا سىلتەمە جاساپ.
«ارينە، بۇل تەك ەرىكتى تۇردە، اتا-انالاردىڭ كەلىسىمىمەن عانا جاسالادى. ءبىز تەك بالاسىنا ەكپە سالۋعا مۇمكىندىك بەرەمىز»، - دەدى الەكسەي تسوي.
ونىڭ ايتۋىنشا،مينيسترلىككە بالالاردى ۆيرۋستان قورعاۋ ءۇشىن ۆاكتسينا تابۋ تۋرالى كوپتەگەن ءوتىنىش كەلىپ ءتۇسىپ جاتىر.
«وكىنىشكە قاراي، قازىر تەك ەرەسەك ادامدار عانا ۆاكتسينا سالدىرا الادى، بالالارعا كومەكتەسۋگە مۇمكىندىگىمىز جوق. قازىرگى ۋاقىتتا 12 جاستان باستاپ Pfizer ۆاكتسيناسىن سالدىرۋعا كەڭەس بەرىلۋدە. ازاماتتار بۇل ماسەلەنى وزدەرى شەشەدى، بىراق ءبىز ۆاكتسينالاۋعا شاقىرامىز، ويتكەنى ول كومەكتەسەدى. وكىنىشكە قاراي، جاڭا شتاممەن بالالار دا اۋىرادى»، - دەدى مينيستر.
سونىمەن قاتار مينيستر قازاقستاندىق QazVac ۆاكتسيناسىن بالالارعا سالىپ سىناقتان وتكىزۋگە قاتىستى سۇراققا جاۋاپ بەردى.
«ءبىزدىڭ زاڭنامادا ەكپەنى بالالارعا سالىپ سىناقتان وتكىزۋگە تىيىم سالىنعان. سوندىقتان QazVac بويىنشا مۇنداي زەرتتەۋ جۇرگىزىلىپ جاتقان جوق»، - دەدى تسوي.
19 شىلدەدە وتكەن كەڭەستە مەملەكەت باسشىسى قاسىم-جومارت توقاەۆ QazVac ۆاكتسيناسىن دۇنيەجۇزىلىك دەنساۋلىق ساقتاۋ ۇيىمىندا تىركەۋدى جەدەلدەتۋدى تاپسىرعان ەدى.
"ادىرنا" ۇلتتىق پورتالى
