الماتىدا بەكەتتەر ورناتىلىپ، قالا اۋماعىنا ءتىرى مال وتكىزۋگە تىيىم سالىندى دەپ حابارلايدى "ادىرنا" ۇلتتىق پورتالى "ەۋرازيا" ارناسىنا سىلتەمە جاساپ.
بۇل — قاسيەتتى قۇربان ايت مەرەكەسى قارساڭىندا كوپشىلىك ىندەت جۇقتىرىپ الماس ءۇشىن جاسالىپ جاتقان شارا. جاڭا قاۋلىعا سايكەس، مەگاپوليستەگى مال سوياتىن تسەحتار مەن بازارلاردىڭ جۇمىس ىستەمەيدى، مالدى اۆتوكولىكتەر مەن جەكەمەنشىك ۇيلەردە ساتۋعا جانە سويۋعا بولمايدى.
نيەت ەتكەن جاندار ونلاين تاپسىرىس بەرىپ، ولاردىڭ قۇرباندىعى مەشىتتە عانا شالىنباق. بۇدان بولەك، ءتورت تۇلىكتىڭ ەتى ينتەرنەت ارقىلى تاپسىرىس بەرگەندەرگە تاراتىلادى.
"سويىلعان مالدىڭ ەتىن دەر كەزىندە تاراتۋ بويىنشا وسى ءمۇفتياتتىڭ جانىنان قۇرىلعان جۇمىسشى توپقا قوسىمشا ۆولونتەرلار تارتىلاتىن بولادى. ولار دەر كەزىندە مۇقتاج جاندارعا ەتتەردى ۇلەستىرۋگە كومەكتەسەتىن بولادى. وسى جىلى دا qurban2021.kz سايتى ارقىلى وتىنىمدەر قابىلداناتىن بولادى. ءوز كەزەگىندە قالالىق اكىمدىك تاراپىنان بارلىق كارانتين تالاپتارى ساقتالۋىن قامتاماسىز ەتۋ بويىنشا مونيتورينگتىك جۇمىستار جۇرگىزىلەدى", — دەيدى الماتى قالالىق ءدىن ىستەرى جونىندەگى باسقارما باسشىسىنىڭ ورىنباسارى ەرعالي قوشەكە.
جاڭا قاۋلىعا سايكەس، مەشىتتەردە ايت نامازى دا وقىلمايدى. سونىمەن قاتار ۇيىمدار، جەكە ۇيلەر مەن مەدرەسەلەردە، ادامدار كوپ جينالاتىن ورىنداردا ءىس-شارالار وتكىزۋگە تىيىم سالىندى. شەكتەۋلەر 22 شىلدەگە دەيىن جالعاسادى. ال، قۇربان شالعان ازاماتتاردىڭ بارلىعىنا بۇل ءراسىمنىڭ قالاي جۇرگىزىلگەنى ۆيدەو، سۋرەتتەر ارقىلى جىبەرىلەتىن بولادى.
ايتا كەتۋ كەرەك، مۇنداي شارالار ەلىمىزدىڭ كوپ بولىگىندە وتكىزىلەدى. بۇل ەلدەگى ەپيدەميولوگيالىق جاعدايمەن بايلانىستى بولىپ وتىر.
"ادىرنا" ۇلتتىق پورتالى.
