وتكەن تاۋلىكتە ەلىمىزدە 5314 ادام، شىمكەنتتە 416 ادام كوۆيد ينفەكتسياسىن جۇقتىرعان. بۇرىن-سوڭدى كوۆيد جۇقتىرعان مۇنشا ادام انىقتالماعان. انتيرەكورد.
شىمكەنت قالاسىنداعى ەپيدەميولوگيالىق جاعدايعا بايلانىستى كارانتين شارالارى كۇشەيتىلىپ وتىر. دەمالىس كۇندەرى تولىق لوكداۋن. قوعامدىق كولىك، مەيرامحانا، بازارلار، ساۋدا ۇيلەرى مەن ويىن-ساۋىق ورتالىقتارىنىڭ جۇمىسى توقتاتىلادى.
تارازىنىڭ ءبىر باسىندا بيزنەس پەن قىزمەتكەرلەردىڭ مۇددەسى، ەكىنشى باسىندا حالىقتىڭ دەنساۋلىعى مەن ادامداردىڭ ءومىرى تۇر.
بيزنەستەن شەكتەۋ شارالارىنا تۇسىنىستىكپەن قاراۋدى سۇرايمىز. بىرەر اپتا ەپيدجاعدايدى باقىلاپ كورەمىز. جاعداي جاقسارىپ جاتسا، شەكتەۋ جەڭىلدەتىلەدى. بيزنەستىڭ تابىستى جۇمىس ىستەۋىنە اكىمدىك اسا مۇددەلى. دەگەنمەن، حالىقتىڭ ساۋلىعى اسا قىمبات. شەكتەۋ - ۋاقىتشا. باردىڭ ورنى تولادى، ەڭ باستىسى جاقىندارىمىزعا جاناشىر بولايىق.
شىمكەنت قالاسىنىڭ تۇرعىندارىن دا شەكتەۋ شارالارىنا تۇسىنىستىكپەن قاراپ، كوپشىلىك ورىندارعا بارماي، ساقتانىپ ءجۇرۋدى وتىنەمىز.
اسىرەسە، ۇيدە اياعى اۋىر كەلىندەرى بار اتا-ەنەلەر مەن اكەلەر ساقتانىپ جۇرگەنى ابزال، مۇمكىندىگىنشە قوناققا بارماي، قوناق شاقىرماعان ءجون. الدىمىزدا قۇربان ايت كەلە جاتىر. قازىر ايتتاپ جۇرەتىن كەزەڭ ەمەس. باس امان، باۋىر ءبۇتىن بولسا، ايت تا، توي دا ەشقايدا قاشپايدى.
شىمكەنتتە 15 500-دەن استام جۇكتى ايەل بار. سوڭعى ۋاقىتتا كوروناۆيرۋس جۇقتىرعان جۇكتى ايەلدەر كوپ ءتۇسىپ جاتىر. اياعى اۋىر ايەلدىڭ اعزاسى كوتەرەر جۇك ونسىز دا كوپ. وعان كوروناۆيرۋس قوسىلسا، جاعدايدىڭ قالاي بولاتىنىن بىلە بەرىڭىز.
بۇگىندە شىمكەنتتە 2 564 ناقۋاس ەمدەلىپ جاتىر (1 346 ناۋقاس اۋرۋحانالاردا، 1 218 ناۋقاس ۇيلەرىندە). سونىمەن بىرگە كوروناۆيرۋس ىندەتىن جۇقتىرعان ناۋقاستارمەن قاتىناستا بولعان 6 379 ازامات امبۋلاتورلىق باقىلاۋدا.
شاھاردا مامانداندىرىلعان ينفەكتسيالىق 2 196 توسەك-ورىن بار. ءدارى-دارمەك پەن وكپەنى جاساندى جەلدەتۋ قۇرىلعىسى (يۆل) جەتكىلىكتى. جاعداي اكىمدىكتىڭ قاتاڭ باقىلاۋىندا. دەگەنمەن، اۋىرىپ ەم ىزدەگەنشە، اۋىرماۋدىڭ جولىن ىزدەگەن ءجون.
