ەلدە قۋاڭشىلىق بولىپ، مال تالعاجاۋ قىلار ءشوپ تاپپاي قىرىلىپ جاتقاندا قۇرمەت تالاپقازى ەسىمدى ازامات حالىققا ۇندەۋ جاسادى. ول وزەن-كول جاعالارىنداعى قامىستى ورىپ، باتىس وڭىرلەرگە جونەلتۋدى ۇسىندى. بۇل ۇسىنىس ەل ىشىندە كەڭ قولداۋ تاۋىپ، قۇرمەتپەن بىرلەسە قيمىلداۋشىلار سانى ارتتى.
ناتيجەسىندە باتىسقا ۆاگون-ۆاگون ءشوپ جىبەرىلە باستادى. 24 جاستاعى قۇرمەت تالاپقازى باق-قا بەرگەن سۇحباتىندا بازاردا جۇمىس ىستەيتىنىن ايتتى. بىراق ونىڭ جوعارى ءبىلىمى جوق ەكەن. بۇل تۋرالى ونىڭ دوسى سۇندەت سەيىتوۆ Facebook پاراقشاسىندا مالىمدەدى، دەپ حابارلايدى “ادىرنا” ۇلتتىق پورتالى Oinet.kz سايتىنا سىلتەمە جاساپ.
"قۇرمەت - مەنىڭ دوسىم. بىرنەشە جىلدان بەرى جاقسى ارالاسامىز. وزىمدە تالاي قوناق بولدى. بىراق، سودان ءبىر جىلداي ۋاقىت كورىسپەي كەتتىك. ەندى مىنە، مەنىڭ ءوزىم ونى ينتەرنەتتەن كورىپ، تاڭدانىپ وتىرمىن. ول قىتايدان اتامەكەنىنە كەلىپ، وسى شىمكەنتتى پانالادى. دايىندىق كۋرسىندا وقىپ، م. اۋەزوۆ اتىنداعى وقۋ-دىڭ ستۋدەنتى اتاندى.
كەيىننەن ورىس ءتىلىن بىلمەگەنى ءۇشىن ءھام وتباسىلىق جاعدايدىڭ سالدارىنان وقۋدان شىعىپ كەتكەنىن ەستىدىم. قۇرمەتكە قۇرمەت كورسەتۋىمىز كەرەك. الدىمەن ءوز ماماندىعىنىڭ يەسى ەكەنىن دالەلدەيتىن كۋالىگىن (ديپلوم) اپەرىپ، سوسىن وعان شىمكەنتتە تۇرۋعا جاعداي جاساۋدىڭ شاراسىن كورۋىمىز كەرەك.
وقۋ-دىڭ رەكتورى داريا كوجامجاروۆا اپايىمىز شاكىرتىنىڭ وقۋ جاعدايىن قالىپقا كەلتىرەرىنە سەنىمدىمىن. اپايىم بۇعان بەيجاي قارا المايتىنىنا ەش كۇمانىم جوق. قۇرمەتكە قۇرمەت كورسەتۋىمىز كەرەك!" - دەپ جازدى سۇندەت سەيىتوۆ.
