Elde qýańshylyq bolyp, mal talǵajaý qylar shóp tappaı qyrylyp jatqanda Qurmet Talapqazy esimdi azamat halyqqa úndeý jasady. Ol ózen-kól jaǵalaryndaǵy qamysty oryp, Batys óńirlerge jóneltýdi usyndy. Bul usynys el ishinde keń qoldaý taýyp, Qurmetpen birlese qımyldaýshylar sany artty.
Nátıjesinde Batysqa vagon-vagon shóp jiberile bastady. 24 jastaǵy Qurmet Talapqazy BAQ-qa bergen suhbatynda bazarda jumys isteıtinin aıtty. Biraq onyń joǵary bilimi joq eken. Bul týraly onyń dosy Súndet Seıitov Facebook paraqshasynda málimdedi, dep habarlaıdy “Adyrna” ulttyq portaly Oinet.kz saıtyna silteme jasap.
"Qurmet - meniń dosym. Birneshe jyldan beri jaqsy aralasamyz. Ózimde talaı qonaq boldy. Biraq, sodan bir jyldaı ýaqyt kórispeı kettik. Endi mine, meniń ózim ony ınternetten kórip, tańdanyp otyrmyn. Ol Qytaıdan atamekenine kelip, osy Shymkentti panalady. Daıyndyq kýrsynda oqyp, M. Áýezov atyndaǵy OQÝ-dyń stýdenti atandy.
Keıinnen orys tilin bilmegeni úshin hám otbasylyq jaǵdaıdyń saldarynan oqýdan shyǵyp ketkenin estidim. Qurmetke qurmet kórsetýimiz kerek. Aldymen óz mamandyǵynyń ıesi ekenin dáleldeıtin kýáligin (dıplom) áperip, sosyn oǵan Shymkentte turýǵa jaǵdaı jasaýdyń sharasyn kórýimiz kerek.
OQÝ-dyń rektory Darııa Kojamjarova apaıymyz shákirtiniń oqý jaǵdaıyn qalypqa keltirerine senimdimin. Apaıym buǵan beıjaı qara almaıtynyna esh kúmánim joq. Qurmetke qurmet kórsetýimiz kerek!" - dep jazdy Súndet Seıitov.
