ماڭعىستاۋ وبلىسىندا قر تاۋەلسىزدىگىنىڭ 30 جىلدىعى اياسىندا 153 شارا وتەدى. بۇل تۋرالى قوعامدىق كوممۋنيكاتسيا ورتالىعىندا وتكەن بريفينگىدە ماڭعىستاۋ وبلىسى ىشكى ساياسات باسقارماسى باسشىسىنىڭ ورىنباسارى باتىرحان قۋانىشبەكوۆ ءمالىم ەتتى، دەپ حابارلايدى «ادىرنا» ۇلتتىق پورتالى ماڭعىستاۋ وبلىسىنىڭ قوعامدىق كوممۋنيكاتسيا ورتالىعىنا سىلتەمە جاساپ.
ونىڭ ايتۋىنشا، نەگىزگى ماقسات تاۋەلسىزدىكتىڭ 30 جىلدىق مەرەيتويىنىڭ ماڭىزى مەن تۇڭعىش پرەزيدەنت – ەلباسى ن.ءا.نازارباەۆتىڭ تاۋەلسىز قازاقستاننىڭ قالىپتاسۋى مەن دامۋىنداعى ءرولىن جەتكىزۋ ارقىلى قازاقستاندىقتاردىڭ پاتريوتتىق سەزىمىن كۇشەيتۋ.
«بۇل باعىتتا ارتىق شىعىنعا الىپ كەلەتىن، يميدجدىك، ءبىر رەتتىك شارالار قىسقارتىلدى. حالىققا قاجەتتى، الەۋمەتتىك سالادا ماڭىزدى جوبالارعا دەن قويىلدى. شىلدە ايىندا «استانا كۇنى. نۇر-سۇلتان – تابىس پەن وركەندەۋدىڭ سيمۆولى» تاقىرىپتىق جەلىسى بويىنشا وبلىستىڭ بارلىق قالالارى مەن اۋداندارىندا جوسپارلانعان شارالار ءتيىستى دەڭگەيدە وتكىزىلۋدە. قازىرگى پاندەميالىق احۋالدىڭ ناشارلاۋىنا بايلانىستى كوپتەگەن شارا تەك ونلاين فورماتتا وتكىزىلىپ وتىر. سونىمەن قاتار، 27 وندىرىستىك جانە الەۋمەتتىك-مادەني نىساندى حالىق يگىلىگىنە تاپسىرۋ جوسپارلاندى. قازىر بىرقاتارى پايدالانۋعا بەرىلدى»، - دەدى باتىرحان قۋانىشبەكوۆ.
سونداي-اق مەرەيتوي اياسىندا وبلىس اكىمى «ەل يگىلىگى ءۇشىن!» جوباسىن بەكىتىپ، قۇجات ءتيىستى ورگاندارعا ورىنداۋ ءۇشىن جولداندى.
ايتا كەتەيىك، جوبا 10 تاقىرىپقا بولىنگەن جانە 74 تارماقتان تۇرادى. اتاپ ايتقاندا، «ءبىلىم - تاۋسىلماس قازىنا»، «سپورت – دەنساۋلىق كەپىلى»، «دەنى ساۋ ۇلت - قۋاتتى مەملەكەت»، «مادەنيەت - ۇلتتىڭ بەينەسى»، «قايىرىمدىلىق – ىزگى قاسيەت»، «وتباسى – باستى قۇندىلىق»، «جاستار – تاۋەلسىز ەلدىڭ تىرەگى»، «باستى مىندەت – حالىققا قىزمەت»، «اۋىلىم - التىن بەسىگىم»، «حالىق ءۇشىن قولايلى ورتا».
«مەرەيتويعا وراي «جاڭارعان جاڭاوزەن» جوباسى جۇزەگە اسىرىلۋدا. جوبا جاڭاوزەن قالاسىنىڭ الەۋمەتتىك-ينفراقۇرىلىمىن دامىتۋدى، الەۋمەتتىك-مادەني، ءبىلىم، سپورت شارالارىن ۇيىمداستىرۋدى كوزدەيدى»، - دەدى باتىرحان قۋانىشبەكوۆ.
"ادىرنا" ۇلتتىق پورتالى
