15 كۇنگە قامالدى: اكىمدىك قىزمەتكەرى ماس كۇيىندە كولىك جۇرگىزگەن

839

وسكەمەن قالاسىنىڭ سوتى ماس كۇيىندە تۇرعىندارمەن كەزدەسۋگە كەلگەن قالا اكىمدىگىنىڭ قىزمەتكەرىنە قاتىستى ءىستى قارادى، دەپ حابارلايدى «ادىرنا» ۇلتتىق پورتالى Sputnik قازاقستان سايتىنا سىلتەمە جاساپ.

YK-news.kz جەرگىلىكتى پورتالىنىڭ حابارلاۋىنشا، ءىس وسكەمەن قالاسىنىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان سوتىندا قارالعان.

سوت قالالىق اكىمدىكتىڭ قىزمەتكەرى 11 شىلدەدە ماس كۇيىندە اۆتوكولىككە وتىرعانىن انىقتادى. بۇل فاكت ساراپتامادا انىقتالدى، شەنەۋنىكتىڭ ءوزى دە جوققا شىعارمادى.

سوت قاۋلىسىمەن ايەل 15 تاۋلىككە قاماۋعا الىندى. سونىمەن قاتار ول جەتى جىلعا دەيىن كولىك قۇرالىن باسقارۋ قۇقىعىنان ايىرىلدى. شەشىم زاڭدى كۇشىنە ەنگەن جوق.

باسى داۋعا قالعان وسكەمەندىك شەنەۋنىك

وسكەمەن اكىمدىگىنىڭ ماس قىزمەتكەرى  جىلجىمالى ۆاكتسينالاۋ پۋنكتىنىڭ ماڭىندا ۆيدەوعا ءتۇسىپ قالدى. قالالىق اكىمدىك پەن شىعىس قازاقستان وبلىسىنىڭ پوليتسيا دەپارتامەنتى بۇل جاعدايعا تۇسىنىكتەمە بەردى.

كۋاگەرلەردىڭ ايتۋىنشا، ول ۆاكتسينالاۋعا ارنالعان اۆتوبۋستىڭ جانىنان ءوتىپ بارا جاتىپ، اۆتوبۋستىڭ ەسىكتەرى جابىق، ال دارىگەرلەر ادامداردى قابىلداماي جاتقانىن بايقاعان. ونىڭ سوزىنشە، اۆتوبۋستاعى دارىگەرلەر بەتپەردە رەجيمىن ساقتاماعان.

ەر ادام ءىستىڭ ءمان-جايىن انىقتاۋ ءۇشىن پوليتسيا مەن قالالىق اكىمدىكتىڭ قىزمەتكەرلەرىن شاقىردى.

«بىزگە ينديرا قالجاباەۆا ەسىمدى ازامات كەلدى، ءوزى ماس، بىراق سوعان قاراماستان كولىك ايداعان. ول دا ەشتەڭە تۇسىندىرە المادى»، - دەلىنگەن Instagram-دا road_control_kz پابليگىندە جاريالانعان جازبادا.

اكىمدىك قىزمەتكەرگە قاتىستى شارا قابىلدادى.

«11 شىلدە قالا اكىمى اپپاراتىنىڭ قىزمەتكەرى قالجاباەۆا ينديرا عادىلشينقىزىنىڭ قاتىسۋىمەن بولعان وقيعا جايلى كەلەسىنى حابارلايمىز. پوليتسيا كولىكتى ماس كۇيىندە جۇرگىزۋ فاكتىسى بويىنشا اكىمشىلىك ءوندىرىس باستادى. پوليتسيا باسقارماسىنان ماتەريالدار تۇسكەننەن كەيىن اكىمدىك بولعان وقيعا مەن مەملەكەتتىك قىزمەتكەردىڭ ەتيكاسىن ساقتاۋ ماسەلەلەرى بويىنشا قىزمەتتىك تەكسەرىس جۇرگىزەدى. بارلىعىن انىقتاعانعا دەيىن قالجاباەۆا جۇمىستان شەتتەتىلدى»، - دەپ حابارلادى Yk-News باسىلىمى.

شىعىس قازاقستان وبلىسىنىڭ پوليتسيا دەپارتامەنتى 54 جاستاعى ايەل ماس كۇيدە Hyundai Accent كولىگىن جۇرگىزىپ بارا جاتقان جەرىنەن توقتاتىلعانىن مالىمدەدى.

"ادىرنا" ۇلتتىق پورتالى

پىكىرلەر
رەداكتسيا تاڭداۋى