اقتوبەدە قازاقتىڭ اتى اڭىزعا اينالعان بالۋانى قاجىمۇقان مۇڭايتپاسۇلىنىڭ 150 جىلدىق مەرەيتويىنا وراي "Batyrs Battle" سپورتتىق سايىسى ءوتتى دەپ حابارلايدى "ادىرنا" ۇلتتىق پورتالىنىڭ ءتىلشىسى.
شارانى رەسپۋبليكالىق "قازاقستاندىق سپورتشىلار وداعى" ۇيىمداستىردى. ال باعدارلاما ء"ساتتى جۇلدىز" اق جانە "Sportqory" قارجىلىق قولداۋىمەن جۇزەگە استى. جوبانىڭ اۆتورى — قر مادەنيەت جانە سپورت مينيسترلىگىنىڭ امباسسادورى، كۇش قولدانىلاتىن سپورت تۇرلەرىنەن 4 دۇركىن رەكوردسمەن سەرگەي تسىرۋلنيكوۆ.
شاراعا قوناق رەتىندە زىلتەمىرشى، بىرنەشە دۇركىن الەم چەمپيونى يليا يلين جانە بوكستان الەم جانە ازيا چەمپيونى گاليب دجافاروۆ قاتىستى.
«جەكپە-جەك» سپورت سارايىندا وتكەن سايىسقا اقتوبە وبلىسىنان 8 سپورتشى قاتىستى. ولار 60-90 كەلى قاپتى بيىككە كوتەرۋ، مەتالل شىبىقتى مايىستىرۋ، بورەنە، تاس كوتەرۋ، بەلدەسۋ بويىنشا سىنعا ءتۇستى. ناتيجەسىندە سەرگەي گونچاروۆ جەڭىمپاز اتاندى. ال ءىى ورىندى دميتري ەمەليانوۆ، ءىىى ورىندى تولەگەن ءالجانوۆ يەلەندى.
ۇزدىك اتانعان سەرگەي گونچاروۆ الدا نۇر-سۇلتان قالاسىندا وتەتىن رەسپۋبليكالىق جارىستا اقتوبەنىڭ نامىسىن قورعايتىن بولادى.
— «Batyrs Battle» سايىسى بۇعان دەيىن وسكەمەن قالاسىندا ۇيىمداستىرىلدى. ەندى اقتوبەمەن قاتار مۇنداي شارا ەلىمىزدىڭ تۇركىستان جانە نۇر-سۇلتان قالالارىندا وتەدى. قاجىمۇقان بابامىز — كۇرەستىڭ بىرنەشە تۇرىنەن الەم چەمپيونى اتانعان قازاقتان شىققان تۇڭعىش كۇش يەسى. سوندىقتان بۇگىنگى شارا قاجىمۇقان، بالۋان شولاق بابالارىمىزدىڭ جاتتىعۋ ءۇردىسىن جالعاپ، حالىق اراسىندا كەڭىنەن ناسيحاتتاۋ ءۇشىن وتكىزىلىپ وتىر, — دەيدى رەسپۋبليكالىق «قازاقستاننىڭ سپورتشىلار وداعى» قوعامدىق بىرلەستىگىنىڭ توراعاسى ازامات قارلىعاشوۆ.
ال زىلتەمىرشى، بىرنەشە دۇركىن الەم چەمپيونى يليا ءيليننىڭ ايتۋىنشا، مۇنداي شارانىڭ ەلىمىزدە، ونىڭ ىشىندە اقتوبە وڭىرىندە ۇيىمداستىرىلۋى — وتە قۋانتارلىق جاعداي. بۇل باستامانى كوتەرگەن اقتوبەلىكتەردىڭ بەلسەندىلىگىنە ءسوز جوق.
"ادىرنا" ۇلتتىق پورتالى.
